L214 elkarteak kamara ezkutu baten bidez Mauleko hiltegian burutzen diren praktikak agerian utzi ditu. Laborantza Ministroa den Stéphane Le Follek agiri baten bidez animalien kontrako tratu txarren aitzinean haserrea adierazi du. Prefetari hiltegia behin-behinean hetsia izan dadin galdegiteaz gain, Estatu frantseseko gainerateko prefetei hilabete batez hiltegi guziak ikertuak izan daitezen eskatu die. Mauleko hiltegia hilabete batez hetsiko dute; ondorioz kamioiak Donibane Garaziko hiltegira bideratzen hasi dira.

Le Follek hiltegietan tratu txarrak erakusten dituen hirugarren bideoa dela azpimarratu du. L214 elkarteak Vigan eta Alèseko hiltegietako praktikak ere grabatu baizituen. Iragan urteko azaroan ministroak hiltegietan tratu txarren kontrako prebentzio neurriak hartzea eskatu zien prefetei.

Ildo horretatik, hemendik hilabete batera animalien babeserako ikuskatzeak burutzea eskatu die Prefektura guziei. Gainera, ikerketa horietan arazoak agertuko balira zentroak hestea eskatzeaz gain, prozedura bat abiatzea galdegin die.

"Borroka ezberdina"

ELB sindikatuak irudiak "harrigarriak eta bortitzak" direla azpimarratu du. "Laborari bezala nire kabalak maite ditut. Haztean badakit hazkurri bilakatuko direla baina baldintza onetan hil behar dira; hiltze duin bat merezi dute", azaldu du idazkari nagusia den Panpi Saint-Mariek.

Bere azalpenen arabera, animalien hilketaren baldintzak eragin zuzena dute haragiaren kalitatean. "Hunkitua naiz gainera milaka pertsonek irudi horiek ikusiko dituztelako eta horrek eragin handia ukan dezake haragiaren kontsumoan", erantsi du. Bere iritziz, L214 elkarteak eta sindikatuak "ez dute helburu berdina". Hots, "elkarteak hiltegia hetsi eta haragia ez jatea nahi du"; "guk hiltegietan baldintza onak lortu nahi ditugu", aipatu du.

Halaber, hiltegietako lan erritmoak eragina ukan duela pentsatzen du. Egin moldeak "ezin onartuak" direla azpimarratzearekin batean, hiltegiaren gaitasuna gainditu izanaren ondorio ere izan daitekeela aipatu du. "Pazko baino aste bat lehenagoko irudiak dira. Katean ehun animali hiltzen ahal badira, egun horietan 140 zeuden", zehaztu du.

Mauleko hiltegiaren hesteak laborariak hunkituko dituela uste du; batez ere zirkuitu laburrei esker bizi direnak. ELB sindikatutik "afera zuritzea" galdetzen dute, "arduradunak bilatu behar dira" diote.