Eguraldia
Joxe Landaren iragarpena
Gaurko eguraldia

MOTEL HASIKO DA EGUNA BAINA GERORA HOBEAGOTU

Motel eta triste samar goizean, laino narrasak arrastaka direla, ateriari eutsi ezinean eta fresko. Gerora lainoak saretu eta pixka bat argituko du eguzkiaren keinuarekin. Haizeak ipar ukitua ibiliko du, baina suabe. Beraz, ipar partean zikin samar eta hegoaldean oskarbia nagusi. Tenperaturak apur bat irabaziko du nonahi ere. Ekialdean euri pixka bat goizean. Hobetzeko joera agertuko du antizikloiaren kokapen egokiagoari esker. Goi geruzak sano eta behetako izaera hobetzen, hezetasuna ere apur bat gutxituaz. Epeltzea kosta egingo zaio.

Bihar

EGURALDI DOTOREA EGUZKIA BISTAN DELA ETA EPELAGO

Dotoreziak eta goxotasunak galanki irabaziko dute, eguzkia bistan dela. Zeru sabaia urdin eta goizeko behe laino eta ganduak ere laster xurgatuko ditu eguzkiak, hego ukituko haize leunak lagunduta. Hala ere, kosta egingo zaio tenperaturari asko igotzea, baina giroaren goxotasuna nabaritzeko heinean lortuko du hori ere. Europako antizikloiaren eta Atlantikoko borraskaren isobarek konbinazio ona egingo dute lurralde honetan giro ona bermatzeko. Goizeko freskura eta behe laino batzuk izango dira gaurko akatsik handienak eta gutxi iraungo dute horiek.

Joxe Landa. (Gorka RUBIO / ARGAZKI PRESS)