Elkarretaratzea egin dute Baionan Steve Maiaren omenez

Steve Maiaren heriotza salatzeko elkarretaratzea antolatu zuten barda Baionako herriko etxearen aitzinean. Nantesen Musikaren Besta kari egindako kontzertuaren biharamunean, kaian bildutako gazteen kontra oldartu zen polizia. Horren eraginez, hainbat lagun uretara erori ziren, horien artean Steve. Bere gorpua atzeman dute aste honetan, hilabete bat bere bila pasa ondotik.

Kazeta|01/08/2019 13:43|0 commentaires
Guz_manif_steve_bobedme101
Askatasun plazan bildutako lagunek polizi indarkeria salatu dute. Bob EDME

Txaleko Horiak, Frantzia Intsumitua eta Ipar Euskal Herriko Antifaxista sarea izan ziren uztailaren 31n 20.00etan Baionako Herriko Etxearen aurrean eginiko elkarretaratzearen bultzatzaileak. Steve Maia Caniço (24 urte) oroimenean eginiko ekimen honen bidez gaztearen heriotza argitzeko galdegin zuten, Naiz atariak plazaratu duenez.

Oroitarazi behar da 24 urteko gaztearen gorpua atzeman ondoren, bere heriotzak loturarik ez zuela frantses Poliziak ekainaren 22an Nantes hirian eginiko kargarekin adierazi zuela Castaner Barne ministroak. Hala ere, nahigabeko heriotza izan zelakoan ikerketa zabaldu du frantses Justiziak.

Steve Maia Caniço hezitzaile zen eta beste hainbat lagunekin batera Musikaren Besta kari antolaturiko kontzertu batetara joan zen. Biharamunean, goizaldeko 4ak aldera, gazteak soinu ekipoa biltzeko lanetan zirelarik polizia azaldu zen.

Steveren lagunek azaldu zutenez - "Liberation" egunkariak zabalduriko bideoek bat etortzen dira bertsio horrekin- poliziek ke poteak ea bestelako armak baliatu zituzten. Horren ondorioz 14 bat lagun uretara erori ziren, haien artean azkenik hilotz atzeman zuten gaztea.

Steve Maiaren kasua polizi bortizkeriaren sinbolo berria bilakatu da eta Bretainian zein beste hainbat eskualde eta hirietan, Baionan kasu, bere aldeko elkartasun ekimenak burutu dituzte.