Anaiz Aguirre Olhagaray

Lurralde politika: hautetsiak pozik dira Elkargoan hartu erabakiekin

Lurralde batzordeei “iniziatibarako botere” gehiago eman eta hauen proiektuak hiru urtez 10 milioi eurotaraino izanen dituen “lehiaketa funtsen” bitartez diruztatu ahalko dira.

Hurrengo urratsa gobernantzarako ituna lantzea eta erabakitzea izanen da. © Nahia GARAT
Hurrengo urratsa gobernantzarako ituna lantzea eta erabakitzea izanen da. © Nahia GARAT

Iazko azaroaren 3an hasitako eztabaidak bukaera izan du joan den uztailaren 20ko Euskal Elkargoaren Kontseiluan. 121 auzapezen ekarpenak, herri kontseiluetako itzulia eta Batera plataformak osaturiko herritar audita ezinbestekoak izan dira proiektua aberasteko. Ondorioz, bilkura horretan lurralde politika “abantzu aho batez” onartu zuten hautetsiek. Abstentzio bakarra Angeluko Guy Mondorgek eman zuen.  

Alta, larunbatean hautetsi gehienak pozik baldin baziren ere, aitzinetik lan handi bat egin behar izan dute. “Gaurko aitzinamendu handia suhartasunez hartzen dut”, erran zuen Michel Etchebest Mauleko auzapezak. “Baina adi izatea beharrezkoa da inbestimendu mailan lurralde honetako puntu bat gibelatua izan ez dadin”.

Hastapenean administrazioa sobera zentralizatzen ari zeneko kezka zegoen, baina Alain Iriart Hiriburuko auzapezak uste du “eskaeren zati handi bat kontuan hartua” izan dela. “Lurraldeetako hautetsi ezberdinei itxaropena emanen diegu”, erran zuen Atharratzeko Arnaud Villeneuvek.

Jean-René Etchegaray Euskal Elkargoko lehendakariaren iritziz, “Elkargoaren eraikinaren harri berria” etorkizuneko gobernantza itunerako oinarriak ezarriko ditu. Itun hori 2020ko martxoaren bukaeran bozkatuko litzateke.

Hurbiltasun gehiago

“Hurbiltasun hutsune” bat dagoela uste du Jean René Etchegarayk, bereziki txaleko horiak gogoan hartu zituelarik. Ondorioz, lurralde batzordeei hiru misio eman nahi dizkiete: aholku funtzioa (Elkargoaren erabaki garrantzitsuei buruz iritzia ematen ahalko dute), tokiko iniziatibarako boterea, “poloaren eskalan proiektuak plantan emateko” eta azkenik, Elkargoaren etxeen animaziorako misioa. Herri elkargoetako egoitza ohiak lurraldeko auzapezen, eragileen eta erabiltzaileen “baliabideen lekua” bilakatuko dira.

2019-2021 eperako, herriak hamar milioitako hiru lehiaketa funtsekin lagunduak izanen dira. Gaiei buruzko bi funtsetan eta “proiektuen egituraketa” funtsean banatuko dira.

Uztailaren 20an erabakitako lurralde politikarekin, Etchegarayren ustez epeak ongi betetzen ari dira: Jacqueline Gouraltek eta Sébastien Lecornuk uztailaren 17an Frantziako Ministro kontseiluan aurkezturiko “engaiamendua eta hurbiltasuna” lege-proiektua laster eztabaidatuko da Asanblada Nazionalean eta Senatuan. Horrek erran nahi du XXL elkargoak zatitzeko aukera idekitzen ahalko dela.