Hirigintza planaren kontrako argudioak presentatu arren, Elkargoko hautetsien gehiengoak uztailaren 20an gehiengoz erabaki zuen horiekin aitzinera segitzea. Haietako batzuk gibelapena galdegin zuten, azken hilabetean egin izan den gisa berean.

Azkenerako Arbonako hirigintza plana aldeko 75 botorekin izan zen onartua, kontrako 63 eta 25 abstentziorekin. Ahetzekoak berriz, aldeko 85 boto jaso zituen, 56 kontrako eta 23 abstentzio. Hainbat hautetsik eskatuta, bozketa molde sekretuan burutu zen.

Abian den Bidarteko ur-araztegiaren azterketa ez da urtea bukatu aitzin ezagutuko, baina saturazioa 2021erako iragarria da. Horiek ziren bozketa gibelatzeko hautetsi batzuk emandako arrazoi nagusiak.

Bi agertoki posible

“Aurkezten den agertokia jasanezina da”, deitoratu zuen Maryse Sanpons bidartarrak. Bere iritziz lehentasuna gazteei eta familiei zuzendutako etxebizitza izan behar da. “Ez dezagun utz epe laburreko kalkulu elektoralek gure ur-araztegiaren saturazioa eragin eta beharrezko diren etxebizitzak blokeatu ditzaten”, erran zuen.

Filipe Aramendi urruñarrak ere deliberazioaren kontra bozkatu zuen. “Gurdia zaldiaren aitzinetik jartzen dugu”, adierazi zuen hautetsi abertzaleak. Beretzat gutxienekoa bozketaren gibelapena litzateke, betiere azterketek emango dituzten emaitzak jakin arte. Beste hautetsi batzuk ere kontrakotasunarekin bat egin zuten, horien artean, Biarritzeko Guillaume Barucq eta Michel Veunac, Emmanuel Alzuri Bidarteko auzapeza edo Marc Bérard Lurralde koherentziarako planaren (ScoT) presidentea.

Euria egiten duenean

“Usu hirigintza planen egutegia saneamenduaren aitzinetik jartzen da”, deitoratu zuen Alain Iriartek. Gai horretan lehendakariordea den Hiriburuko auzapezak balizko bi agertoki presentatu zituen: egungo araztegiaren arraberritzea (aski garestia dena) eta beste leku batean berri baten eraikuntza. Egutegiaren mugak ikusirik, 2026a baino lehen ez litzateke egina izanen. Iriartek lehen aukerarekiko kezka agertu zuen, egungo eremuan uholdeak izateko den arriskuagatik.

“Bataila izanen zela erran zidaten eta ikusten dut erasoak alde guzietatik heldu direla”, adierazi zuen haserre Philippe Elissalde Ahetzeko auzapezak. “Gure hirigintza plana ausarta da, eraikigarriak ziren 60 lur hektarea kendu ditugu eta ingurumenaren defentsan inspiratua da guztiz”. Bere burua defendatu eta kalkulu elektoralak ukatu zituen.

“Bidarten kanpatzeko leku bat Ahetzeko herri osoa da. Zertaz ari gara mintzatzen?”, jarraitu du Elissaldek. Alta, onartu zuen Bidarteko ur-araztegiak 2021ean saturazioa ukaiten ahal lukeela, baina “udan, turismoak goia jotzen duenean edota euri aroarekin. Hirigintza plana al da horren ondorioa?”, galdegin zuen aheztarrak. Haatik, Euskal Herrian euria ez da salbuespena, ohikoa baizik.