Michel Berhocoirigoinek, Txet Etcheverryk eta Michel Tubianak “Bakeari aukera guziak eman! Frédéric “Xistor” Hamboure askatu!” idatzitako testua interneten izenpetzen ahal da. Ostiralean epaileek presondegian 30 urte daramatzan euskal presoa baldintzapeko askatasunean uzteko deliberoa hartu eta berehala, Ministerio Publikoak helegitea jarri zuen. Ondorioz, erabaki berri bat hartu bitartean, preso segitu beharko du Harambourek.
Erabakiak arrangura eta haserrea eragin ditu. “Ez da presondegian 30 urte bete dituen pertsona bat preso mantentzeko jarrera hau justifikatzerik, gutxiago, osasun egoera prekarioan izanki eta baldintzapean askatua izateko baldintza guziak betetzen dituenean”, irakur daiteke idazkian eta Ministerio Publikoaren jarrera deitoratu dute erabakia bake prozesua kontuan hartu gabe nahita hartu duela leporatuz.
Hitzak eta ekintzak zentzu berean
Berhocoirigoinek, Etcheverryk eta Tubianak testuan ohartarazten dutenez, “presoen hurbilketa blokatua da eta haietako ainitz, inolako arrazoirik gabe DPS estatuspean mantentzen dituzte”. Ministerio Publikoan hartu duen erabakiak ezinegona sor dezakeela eta guzien sufrimendua berpizten ahal duela ere eransten dute.
“Azken urteak begiratzen ditudanean, enetzat Euskal Herria eredu bat da, gatazkaren konponbidean eta armak kanpo uztean. Estatuaren betebeharra da mugimendua laguntzea”, erran zuen Emmanuel Macronek Biarritzera egindako azken bisitan. Haatik, hitz hauen eta ekintzen arteko kontraesana nabarmendu dute hiru bake ekintzaileek. Justuki hori da Frantziako Estatuari petizioan eskatzen zaiona, hots, adierazpenak eta ekintzak zentzu berean joatea eta “Xistor” Haramboure askatzea.
Sare sozialetan hedapen azkarra izan du petizioak eta jadaneko 3.500 lagun inguruk izenpetu du. Testu osoa irakurri eta izenpetzeko klikatu hemen.