“Hezkunde nazionaleko erreformek euskarazko irakaskuntza mehatxatzen dutela salatu dugu azken asteetan. Omen, murgiltze eredua antikonstituzionala da. Ikastolen garapena etengabe oztopatua da”, adierazi du Euskal Herria Baik agiri baten bitartez. Hori guzia salatzeko eta eskolak euskaldundu egin behar duela aldarrikatzeko, ekainaren 26an 14:00etan elkarretaratzea antolatu du Donapaleun (Bideak).

Mobilizazioak bat eginen du Olivier Dugrip Akitania Berriko akademia errektorearen jitearekin. Izan ere, Pirinio Atlantikoetako auzapezen eta elkargoen lehendakarien elkarteak eskolari zuzendutako formazio saioak antolatu ditu Baxe Nafarroako herrian, “zer etorkizun gure lurraldeentzat?” izenburupean. Mugimendu abertzaleak errektoreak Euskal Herrian den haserrea eta kezka entzutea nahi du.

EH Baik bere arrangura azaldu du familia transmisioa ez delako bermaturik eta horretarako eskolak funtsezko papera betetzeko duelako. Berehalako baliabideak galdegin dizkio Hezkunde Nazionalari: ikastolek behar dituzten postuen diruztatzea; sail elebidunean murgiltzearen orokortzea ama eskoletan eta bigarren mailan egiazko oren parekotasuna; euskarazko irakaskuntzarentzat sail propioa lizeo eta baxoan; eta brebeta eta baxoa euskaraz egin ahal izatea.