Kazeta

CCI eta la Semaine du Pays Basque aurrez aurre

Elkarloturiko bi aferek Baionako Merkataritza eta Industria Ganbararen (CCI) eta astekariaren arteko ika-mika sortu dute. Batak besteari difamazioa aurpegiratzen dio. Justiziak uztailaren 2an emanen du epaia.

André Garretak eta Jean-Philippe Segotek auzitegian elkar ikusiko dute uztailaren 2an.
André Garretak eta Jean-Philippe Segotek auzitegian elkar ikusiko dute uztailaren 2an.

CCI eta la Semaine du Pays Basque astekariaren arteko aferan, bi entitateek Baionako auzitegira joan behar izan zuten ekainaren 5ean, batzuetan bat parte zibila zelarik, besteetan auzipetua. Elkarloturik diren bi kasuak 2018ko urtarrilean jazo ziren.

Jean-Philippe Segot hedabidearen zuzendariaren erranetan, “memento hartan CCIko prentsa idazkariak deitu ninduen eta Medef-i espazio gehiegi ematen geniolakoan, publizitate kontratuak eten nahi zituela erran zidan”. Egiari zor, hori ez da ilegala, nahiz eta hedabideak hori gustuko ez izan.

Erakundeetako buruzagitza lehian

Hilabete bat berantago, astekariak “Gezur handia” izeneko dosierra publikatu zuen, André Garreta CCI-ko presidenteak garraio zergaz erran zituen hitzetan oinarrituz. Honek enpresei ez ziela eraginen adierazi zuen. La Semaine du Pays Basquek prefet ohia eta Jean-René Etchegaray Euskal Elkargoko lehendakaria ere elkarrizketatu zituen. Haien iritziek ez zuten Garretarenekin guztiz bat egiten eta neurriaren alde ezkorrei buruz eztabaida ere egin izan zuten.

Astekariaren arabera, Nilda Jurado CCI-ko presidenteordeak Facebook orrialdean erran omen zuen la Semaine du Pays Basque bankarrotan zela eta Philippe Neys Medef-eko presidenteak erosi izan zuela. Jean-Philippe Segotek uxerraren 40 orrialdeko txostena jaso zuen kontrakoa frogatzeko eta auzitegian CCI-ko ordezkariaren kontra egin zuen difamazioagatik. “Aipu horiek faltsuak dira eta la Semainek 2017an eta baita 2018an ere irabaziak izan ditu. Eta Philippe Neys ez da egunkariaren jabe”.

Alabaina, Nilda Juradok ez zuela gisa horretako mezurik idatzi dio. CCI-ko presidenteordea 2016an Jean-Philippe Segotek astekaria berrerosten ari zen garaiz mintzo zela ziurtatzen du berak.. “Nehoiz ez nuen bankarrotaz hitz egin”. Bere hitzetan, Garretaren kontrako kritika aski gogorrak publikatu ziren, hori guzia Medef-ak aldizkarian publizitatea zuen bitartean. Dena errateko, egiazko lehia bat badago André Garretarekin, biak aurkeztu baitziren 2016 CCi-ko presidentzia hauteskundeetan.

Auzibide pertsonalak

Ondorioz, Garretak berak ere Jean-Philippe Segot eta Axel Bucker publikazio zuzendariaren kontrako salaketa jartzea deliberatu zuen. Hautetsiak ez du garraio tasaren auzia digeritu: “Gezurti eta gaitasunik gabea deitzea gehiegizkoa da”, deitoratu du. France Bleu Pays Basque irratiaren uhinetan bere abokatuak erran zuen 2018ko urtarrilean publizitatea eten ondotik, aldizkariak lehia pertsonal hau publikazio baten bidez konpondu nahi izan zuela. “Bere artikulua frogarik gabekoa zen”, erran zuen André Garretak. Jean-Philippe Segoten hitzetan berriz, afera honetan prentsa askatasuna dago jokoan.

Difamazioa difamazioaren kontra. Hitza hitzaren kontra. Baionako auzitegiak uztailaren 2an hartuko du bi salaketan inguruko erabakia, helegiterik ez bada bederen.