Kazeta

Hamabost hautagai Hendaiako Legarraldea lur eremurako

Aurkeztu diren hamabost proposamenen artean, Saferrak Hendaia eta Urruña arteko lur eremu honetan instalatuko den laborantza proiektua edo proiektuak hautatu behar ditu.

Ekainaren hondarrean erabakiko da Legarraldean garatuko den aktibitatea. © Bob EDME
Ekainaren hondarrean erabakiko da Legarraldean garatuko den aktibitatea. © Bob EDME

Ideiaz beteriko gazteak dira nagusiki Legarraldean beren proiektuaren garapenerako eskaera egin dutenak. Landa eremuko eta lur garapenerako sozietateak (Safer) ekainaren hondarrean erabaki bat hartu beharko du.

Lupuluaren kultura, tearena edo tradizio handiagoa duten Kintoa xerria, bildotsak, ardiak, oilo erruleak, baratzeak... anitz dira aurkeztu diren proiektuak. Haietako batzuk Lapurdiko hegoaldetik heldu dira, zirkuitu laburretan sinesten dute eta Hendaiako hiriak berriki erosi dituen lur hauetan finkatu nahi lukete.

2018ko abendutik, Hendaiako Herriko Etxea 12 hektarearen eta etxaldearen jabea da. Egungo gehiengoak laborantza garatzeko duen egitasmoak iraganean etxebizitzak eraikitzeko zegoen proiektua bazter batean utzi du.

Era berean, printzipio batzuekin bat etortzea nahi luke. Gazteen instalazioari, bio laborantzari edo zirkuitu laburreko proiektuei emanen zaie lehentasuna. Elkarrekin aritzeko prest leudeken hautagaiek aukeratuak izateko santza gehiago lukete.