Trebatu: laborantzan hasi ahal izateko proba

Trebatu elkarteak Baigorriko ibarrean laborantza eremu berri bat proposatzen du, sektore horretan lanean hasi nahi duten jendeei aukera bat emanez.

Kazeta|11/02/2019 06:35|0 commentaires
Arp_111118_736527
Trebatuk eraikinak eta lurrak eskaintzen ditu laborarien instalazioa errazteko. Argazkia Jon Urbe.

Laborantzan hastea zaila izaten ahal dela kontuan harturik, Trebatu elkarteak bi urterako laborantzarako proba eremu bat proposatzen du. Otsailaren 10a aitzin hautagaitzak aurkezteko deialdi bat egin du Baigorriko ibarrerako.

Trebatu laborantza munduko, ekonomia sozial eta solidarioko, laborantza hezkuntzako, kontsumitzaileen elkarteetako eta Euskal Elkargoa bezalako hamar egiturak osatzen dute. Elkartea 2012an sorturiko Reneta (laborantza probetarako eremuen sare nazionala) izeneko sarearen partaide da eta bere ekinbidea Ipar Euskal Herrian eta Landetako hegoaldean garatzen du.

Instalatzeko laguntza eta erraztasunak

Negozioen munduan egin ohi den gisa berean, Trebatuk marko legal, fiskal eta kontulari bat proposatzen du. “Proiektuaren titularrak elkartearekin bitan berritu daitekeen CAPE (enpresa proiekturako berme kontratua) bat izenpetzen du”, azaldu du Kattalin Sainte-Marie elkarteko kideak. Gisa berean, Trebatuk eraikinak eta lurrak eskaintzen ditu, laborantza munduan “familia ingurunerik” ez dutenen instalazioa erraztuz. Noiz eta sektore honetan transmisioa eta instalazioa gai zinez garrantzitsuan diren garaiotan.

Hautagaiek aukera guziak izan ditzaten, laborari bat edo bi eta tokiko laguntza talde bat izanen ditu ondoan. “Lehena aholku teknikoa emateko izanen da hor eta bigarrenak lurraldean integratzen erraztuko dio, bereziki pertsona hori beste nonbaitetik heldu bada”, argitu du Sainte-Mariek.

Entsegu baikorrak

Bere hitzetan, lehen probak nahiko argiak izan dira: “Sarrikotapeko proba eremuan baratzezain den bikoteak bere kontratua bigarrenez berritu du eta orain instalatzeko leku bila dabil. Mendikotan ardi gasnarekin proban zen pertsona jadaneko instalatua da”.

Baigorriko ibarreko eremua 17,10 hektareako etxalde bat da (9,20 hektareako pentzea barne harturik), arditegia eta jezteko eta transformaziorako gela batekin. Ardi edo ahuntzekin proba egiteko leku egokia. Proiektuan sartzen denak bere kabalak erosi behar ditu. Txostenak aztertu ondotik, batzorde batek proiektu bat hautatuko du, baina ez da instalatzeko leku bat izanen. “Proba bukatzean, pertsona horrek beste leku bat xerkatu beharko du”, erran du Kattalin Sainte-Mariek.

Informazio gehiago eskuratzeko Trebatu elkartearen telefonora deitu (0649434942) edo trebatu@outlook.com posta elektronikora idatz daiteke.