ELB diruz laguntzeko deia luzatu dute ahate hazleek

Hegazti gripearen garaian, ahateak hiltzeko agindua jaso zuten ekoizleek ELBk eman zien laguntza eskertu dute. Horrez gain, sindikatuari ezarri dioten 7.070 euroko isunari aurre egiteko kanpaina abiatu dute.

Haritz LARRAÑAGA|23/01/2019 10:53|0 commentaires
Guz_elb_prentsaurrekoa_donapaleu_imiquelestorena01
Agerraldia baliatu dute industria handiek duten boterea salatzeko. ©Isabelle Miquelestorena

Hegazti gripearen zabalkundea gelditzeko beraien ahateak hil behar zituztela agindu zien Estatu frantsesak Ipar Euskal Herriko zenbait etxalderi. Horren aurrean, 2017ko udaberrian ahate hazle batzuek intsumiso jarrera hartu zuten, eta haietako lauk urtarrilaren 22an Donapaleun eskaini zuten prentsaurrekoan gogor salatu zuten ELB sindikatuari ezarri dioten isuna «injustua» dela, Garako artikuluak azaldu duenez.

«Gaixo ez zeuden gure animaliak hiltzera kondenatu gintuztenean, injustizia handi bat pairatu genuen, baina ELB gu laguntzeko mobilizatu zen, nahiz eta gutako batzuk ez ginen sindikatuko kideak», adierazi zuen Cathy Chabalgoityk, Barkoxeko (Zuberoa) Uhartia etxaldeko abeltzainak.

Hain zuzen ere, Chabalgoityri laguntza emateagatik ezarri zion zigor ekonomikoa ELBri Paueko epaitegiak pasa den abenduaren 10ean. Fiskalak Chabalgoityrentzat bete beharko ez lukeen 3 hilabeteko espetxe zigorra eta 10.000 euroko isuna eskatzen zituen hasieran, baina epaileak ahate hazlea absolbitzea deliberatu zuen. Aldiz, Euskal Herriko Laborarien Batasuna (ELB) kondenatu egin zuen, 5.000 euroko isuna eta 2.070 euroko kalte-ordainak ordaintzera.

Aparteko mobilizazioak

Gabadiko Bidaina etxaldeko Bernadette Prebende, Domintxaineko Eihartzia etxaldeko Jean-Michel Berho eta Bidaxuneko Bidouze etxaldeko Florence Lataillade ahate hazleak ere mintzatu ziren. Guztiek egin zioten uko 2017ko udaberrian beren ahateak hiltzeari, eta sasoi hartako gertaerak oroitarazi zituzten.

«Aparteko mobilizazioak izan ziren eta laborari askok parte hartu zuen, gure bezeroak ere han ziren, eta baita inguruko hautetsi andana ere», esplikatu zuen Prebendek. Administrazioarengandik jaso zuten presioaren aurrean, berriz, laborarien sindikatuak eman zien sostengu morala azpimarratu zuen Nafarroa Behereko abeltzainak eta erosleak ere gogoan izan zituen. Chabalgoityk, esaterako, esker onez laudatu zituen, «auzipetua izan arren», bere produktuak erosten jarraitu zuten bezeroak.

Bestalde, mobilizazio haien aurrean Estatu frantsesak hartu zuen jarrera salatu zuten Donapaleun bildutako ahate hazleek. Prebenderen iritziz, «administrazioak ez zuen jasan gure ahateak salbatzeak suposatu zuen garaipen kolektiboa, eta horregatik eraman zituzten auzitara ELB eta Chabalgoity».

Lorpenak eta onarpena

«Egin genuena beharrezkoa zen», esan zuen Jean-Michel Berhok. Hegazti gripearen hazkundearen aurrean neurriak hartzearen alde zirela azpimarratu zuen, baina gainerako ahate hazleek bezala, «administrazioak proposatzen zuenak ez zuela zentzurik» iritzi zion. «ELBri esker borrokatu ahal izan genuen eta irabazi egin genuen», hausnartu zuen Berhok.

Estatuak ezarri zizkien neurrien artean, abeltzainek beren dirutik ordaindu behar zituzten azterketak zeuden. «30.000 euroko kostua, eta hor ere lagundu zuen ELBk, zati bat beraien esku hartu baitzuten», gogoratu zuen hegazti hazle zuberotarrak.

Ahate hazleek aditzera eman zutenez, «egindako borrokari esker administrazioak etxalde txikiei ezartzen zizkien zenbait neurri arintzea lortu da». Horregatik, aurrerantzean ere, hegazti gripe kasuak agertuko direla uste duten arren, zerbitzu sanitarioek beraiekiko izango duten jarrera bestelakoa izango dela iritzi diote.

Desagertzeko zorian zen kriaxera arrazako ahateak hiltzeari uko egin zion Eihartzia etxaldeko ganaduzalea baikor agertu zen aurrera begira. Berhoren aburuz, «arazoa ez da desagertu, kausak hor jarraitzen baitu, baina orain behintzat onartzen dituzte guk hasieratik esaten genituen zenbait gauza, esaterako, orain onartzen dute kutsaduren kasuen %50 ahateak garraiatzerakoan izaten direla, beraz ezin dute neurri berdinak ezartzen jarraitu, ez du zentzurik!».

Araudia, eredu industrialaren alde eta etxalde txikien kaltetan

Industria handiek duten boterea ere salatu zuten ahate hazleek. Haien ustetan, «norma sanitarioak beti baliatzen dituzte txikiak ezabatzeko». Prebendek, esaterako, jakinarazi zuen neurri berriak indarrean jarri zituztenean Landetako etxalde txiki batzuek ekoizteari utzi ziotela. «Nik oso ongi ulertzen ditut, zeren nik ere nire hegazti guztiak hil banitu ez dakit horri buelta nola emango niokeen, urte oso bat deus egin gabe egon beharko nukeen?», galdetzen zuen Gabadiko hazleak.

Ordea, azken urteetan etxalde txikietako laborariak biltzen dituen Confédération Paysanne sindikatu frantsesak eman duen borrokarekin eta lekuko sindikatuen lanari esker, etxalde txikiei egokitutako arauak ezartzeko eskariak indar hartu duela diote. H.L.A