Kazeta

Bere ibilbidea ezagutarazi du Korrikak

Apirilaren 4an abiatuko den Korrikaren ibilbidea jakinarazi du AEKk. Garesetik abiatu eta hiru egun berantago Ipar Euskal Herrira ailegatuko da Luzaidetik. Ondorengo bi egunetan Baxe Nafarroa, Xiberoa eta Lapurdin gaindi ibiliko da.

Korrika Urepeleko plazatik abiatu zen 2014an. (Jagoba MANTEROLA / ARGAZKI PRESS)
Korrika Urepeleko plazatik abiatu zen 2014an. (Jagoba MANTEROLA / ARGAZKI PRESS)

Korrikaren ibilbidearen xehetasunak jakitera eman ditu AEKk urtarrilaren 9an. Ezaguna da nondik eta zer ordutan pasako den euskararen aldeko 21. lasterketa. Ipar Euskal Herrira apirilaren 7an ailegatuko da, Luzaidetik 01.30ak aldera sartu ondotik. Bi egun berantago Hendaia zeharkatu eta, Gipuzkoan gaindi ibiliko da.

Garestik Gasteizera Euskal Herria zeharkatuko du Korrikak apirilaren 4tik 14ra. "Klika" lelopean iraganen den edizioak Jose Luis Alvarez Enparantza Txillardegi hizkuntzalari, idazle eta politikari izandakoa omenduko du kilometro bakoitzean.

Garestik arratsaldean abiatu eta Lizarrara ailegatuko da lehen egunean. Bigarrenean, Erriberatik pasako da. Tafalla zein Zangozatik heldu eta, hirugarren egunean lehen hiriburua bisitatuko du: Iruñea.

Pirinio aldera jo eta Baxe Nafarroara iritsiko da apirilaren 7ko gauean. Xiberora goizean sartuko da, 07.10ean. Lapurdira joko du arratsaldean eta Lapurdiko hiriburuan izanen da 17.50ean. Ondotik, Angelu eta Biarritzera joko du apirilaren 8an Gipuzkoan sartu baino lehen.

Gipuzkoa eta nafar ipar-mendebaldea izanen dira asteleheneko protagonistak, astearteko lehen orduetan Arabara iristeko. Asteazkenean eta ostegunean, berriz, Bizkaian izanen da lekukoa, Bilbora apirilaren 10ean, 10:45 inguruan arribatuz. Bertatik Gipuzkoa aldera itzuliko da, Donostiara apirilaren 12an, ostirala, 16:28an iristeko.

Azkenaurreko egunean, Beasain, Eibar edo Durango bezalako herriak gainditu ostean, apirilaren 14an arribatuko da Korrika Gasteizera, 12:30ean azken metroak egiteko.

Gisa berean, kilometroen lekukoa eramateko aukera urtarrilaren 14an idekiko da. Kilometro zehatza hartzeko eta diru ekarpena egiteko herrialde bakoitzean kontaktu ezberdinak eskuragarri daude webgunean. "Laster bidera aterako gara, mundura aterako gara, herriz herri igaroko gara. Martxan jartzen hasteko egin ezazu Klika, pausuz pausu, gure erritmora!".