Biarritzen jokatuko da hurrengo Munduko Pilota Txapelketa

Bartzelonan iragaten ari den Munduko Pilota Txapelketaren testuinguruan, urriaren 17an Nazioarteko Pilota Federazioak biltzar nagusia egin du. Bertan batzen diren federazioek 2022ko txapelketa Biarritzen jokatzeko deliberoa hartu dute.

Kazeta|19/10/2018 07:55|0 commentaires
Guz_master_fetes_bayonne_bobedme101
Badira 44 urte, Munduko Pilota Txapelketa Euskal Herrian jokatu zen.

Bartzelonako Munduko Pilota Txapelketa oraindik amaitu gabe, jadaneko erabaki dute hurrengo edizioa non jokatuko den. Euskal Herriak hartuko du lekukoa, zehazki Biarritzek. 44 urte joan dira Lapurdiko herrian azkenekoz txapelketa jokatu zenetik, orduko hartan Baionarekin batera partekatu zuelarik antolaketa.

Nazioarteko Pilota Federazioak Kataluniako hiriburuan egindako biltzar nagusian hartu du erabakia. Oraindik xehetasun ainitz falta da ezagutzeko, tartean partidak hartuko dituzten pilotalekuak edota jokatuko diren modalitate berriak. Dena dela, berrikuntzak izanen direla iragarri dute.

Biltzar nagusi honetan ondoko lau urteetarako presidentea ere hautatu dute. Sortzez biarriztarra baina naziotasunez mexikarra den Xavier Cazaubonek jarraituko du 2014tik duen kargu horretan, bildutakoek aho batez harturiko erabakiaren ondotik.