Bere disko berria aurkezten hasi da Benito Lertxundi

Urrian kaleratuko du bere 17. diskoa Orioko bardoak, baina aurrerapen kantua entzungai dago jadanik interneten.

Xan Idiart|03/09/2018 14:05|0 commentaires
Benito_lertxundi
Benito Lertxundik urrian kaleratuko du disko berria.

Ospakizun gauean. Izenburu hori ukanen du Benito Lertxundiren ondoko diskoak. Hain zuzen, bere hamazazpigarrena izanen da. Urrian argitaratzekoa da, baina anartean, lehen aurrerapen kantua entzungai dago interneten: Kimu bat zuhaitzan.

Folk kutsua duen abestia, Allan Rankin kanadiarrarena da, Jon Maia bertsolariak euskarara ekarri duena. Haur koru batek parte hartzen du kantuan. Errenteriako Zaria Koru Eskolako ikasleak dira.

Azken denboretan, Orioko bardoak album berri bat onduko zuen edo ez erraten zuten zurrumurruak hedatzen hasi ziren. Azkenean bai. Sei urte eta gero, grabatzeari ekin dio berriro, baina ez usaian bezala. ELKAR diskoetxean ez, baizik eta berak sorturiko Kantaita Enea zigilupean aterako du lan berria, kantuen jabea izaten segitzeko.

Lehen kontzertuak

Orioko Karkara hedabideari azaldu dionaren arabera, hamar kantu izanen ditu orotara disko berriak. Diskoko kantu baten izenburua ere Ospakizun gauean izanen da. "Gaztetan, ospakizun batean nengoela, goizaldeko ordu txikietan izandako esperientzia batean du jatorria izenak" jakinarazi du Benito Lertxundik. "Bizitza osorako markatu ninduen pasadizo hark."

Horrez gain, ametsetan asmatu du melodia bat. Urtarrileko egun batean gertatu zen. "Lan egun on bat amaituta, ohera sartu nintzen, eta amets hori izan nuen." Amets horretan, Orioko elizan zegoen eta doinu bat aditu zuen. Biharamun goizean melodiaz oroitu eta musikatzeari lotu zitzaion estudio gelan.

Entzulego zabal bat Benito Lertxundiren azken diskoaren beha egonen da dudarik gabe. Bi urte iragan ondoren, bere sare sozialak elikatzen ditu berriz kantariak. Zarautzen emanen du lehen kontzertua irailaren lehenean. Sarrera guziak agortuta daude jadaneko. Besteak beste, Donibane Garazin urriaren 27an eta Donibane Lohitzunen abenduaren 9an izanen da Orioko bardoa.