Haurtzaindegi euskaldunaren irekitzea prestatzen eta girotzen ari dira Lakarran

Lakarran kokatuko den Ttinka haurtzaindegi euskaldunaren irekitzearen atarian, iraila eta urrian, lau egunez hainbat animazio eta ekimen antolatu ditu Ttinka elkarteak. 2019ko urtarriletik landa, Baxe Nafarroan murgiltze sistema plantan emanen duen lehen zerbitzua izanen da.

Kazeta|29/08/2018 14:02
Img_6330
Ttinka haurtzaindegia aurkezteko prentsaurrekoa ©Iurre Bidegain

Ttinka haurtzaindegiaren proiektua joan den urtarrilean izan zen aurkeztua jendaurrean eta orduan iragarri zuten urtebete berantago bere ateak irekiko zituela. Hilabete guti batzuk besterik ez dira falta urrats hori egiteko eta prestaketa lanekin batera, zabalpen eta girotzerako hainbat ekimen antolatu dituzte Lakarran. Ekimen guziak bertako herriko gelan egingo dira.

Egitarauaren lehena irailaren 8an iraganen da, larunbatez. Hain zuzen, “Ttinkabareta” gisa izendatu duten zirku, dantza, magia eta kantu emanaldia izanen da ikusgai, arratsaldeko 16:30etik landa.

Bi aste berantago, irailaren 23an, igandez, “Sehaska hustea” antolatu dute, jateko eta edateko aukera emanez jendeari.

Proiektuaren eta murgiltze sistemaren informazio zehatzagoa emateko berriz, hitzaldia eskainiko dute, urriaren 5ean. “Inmertsioa lehen haurtzaroan” izenburuarekin, arratseko 20:30ean hasita.

“Josta Eguna”-k emanen dio amaiera ekimen sorta honi. Urriaren 20an, larunbatarekin, haurrek gozatzeko eta ongi pasatzeko aukera izanen dute haientzat prestaturiko jolas eta tailerretan.  

Haurtzaindegiaren ezaugarriak eta helburuak

Proiektuaren nondik norakoak, urtarrileko agerraldi hartan aurkeztu zituzten. Haurtzaindegi bat sortzeko ideia, duela zenbait urte Gamarte eta Lakarra herrien arteko gogoeta fase batetik abiarazi zela oroitarazi zuten.

Haurtzaindegia tipia izanen da eta hastapenean hamar haur inguru errezibituko ditu. Zehazki, hamar aste eta sei urte bitarteko haurrei eginen zaie harrera, horretarako hiru lanpostu eta erdi sortuko dituztelarik.

Leire Bidarte Ttinka elkarteko kideak, haurtzaindegia burasoen beharretara egokituko dela azpimarratu zuen, bai ordutegiarekiko bai kostuarekiko. Burasoei ordutegi zabala eskainiko zaie: 07:00etatik 19:00etara. Halaber, familia bakoitzak ordaindu beharko duena, bere irabazien baitakoa izanen da. “Gainerakoa, besteak beste, CAF, MSA eta Hiri Elkargoaren esku geratuko da” azaldu zuen Bidartek.

Bestetik, Ttinka haurtzaindegiaren egitasmoak xede ezberdinak bete nahi dituela adierazi zuen Jean Michel Bicain Gamarteko auzapezak. Burasoei hurbileko zerbitzu bat eskaintzeaz gain, lanpostuak sortu eta herria dinamizatzeko proiektua izan nahi du. Azpimarratu zuenez, helburu nagusietariko bat euskararen erabilera sustatzea izanen da.