Oneka Jauregi
Hendaitz Gazte Asanbladako kidea

Erabaki judizial bat dela eta, Sasiko Gaztetxea hustu zuen Hendaiako Gazte Asanbladak agorrilaren 25ean. Egun berean suhiltzaileen kaserna ohia okupatzea erabaki zuen. Arratsaldean, okupazioa bertan behera uztearen truke, akordio batera heldu zen Kotte Ecenarro auzapezarekin. Honek hemezortzi hilabeteko epean gaztetxe berri bat proposatuko diola zin egin du.

“Hendaiako Gazte Asanbladaren historian ez gara inoiz hain urrun iritsi”
Iurre BIDEGAIN|27/08/2018 12:52|0 commentaires
Guz_gaztetxe_maire_bobedme103
Oneka Jauregi, eskuinetik hasita lehenengoa. © Bob EDME

Hurrengo astetik aurrera bilerak abiatzeko prest agertu da auzapeza

Gu erne egonen gara, baina, hala ere, segituko dugu gure bidea

Sasiko Gaztetxea hustu eta, suhiltzaileen kaserna ohia okupatzea erabaki zenuten larunbatean. Nola iragan zen eguna?

Oneka Jauregi: Eguerdi aldera sartu ginen, eta berehala deitu genion auzapezari. Ordu batzuk berantago polizia batzuekin etorri zen, oso urduri eta nahiko bortitz. Poliziek kotxeak jasotzen dituzte bertan eta hori dela eta, hortik kentzeko eskatu ziguten. Ez mugitzea erabaki genuen gure artean zer egin erabaki nahi genuelako. Tentsio mementoak bizi izan genituen, fisikoki tokia egiteko bultzatu gintuelako. Azkenean, beste hautetsi bat etorri eta pixkanaka elkarrizketa hasi genuen berarekin.

Zein izan zen elkarrizketaren emaitza?

Auzapezak proposatu zuen hitzarmen bat izenpetzea bera engaiatuz gaztetxe bat lortzeko. Horren truke, gu kaserna zaharretik atera behar ginen. Haiek zirriborro bat idatzi zuten, baina gu ez ginen oso ados.

Zergatik ez zineten zirriborro horrekin ados?

Proposatu baino gehiago baieztatzen zuten beti aterabideak proposatu dizkigutela eta hori ez da egia. Azken bileran esan ziguten, parez pare, ez ginela lehentasun bat eta ez zirela aterabide bat bilatzen ari. Auzapeza engaiatu da lokal bat proposatzera 18 hilabeteko epean eta bitarte horretarako lokal bat aurkitzea elkarrekin. Horrez gain, hurrengo astetik aurrera bilerak abiatzeko prest agertu da.

Horrek zer erran nahi du Hendaiak aste honetan bertan gaztetxe berri bat izan dezakeela?

Ez dut uste. Bitarteko lokal hori ez dago zehaztua, hots, nolakoa izanen den edo noiz emango digun. Proposatuko diguten lokala nolakoa izanen den zehazten saiatu gara. Hau da, gaztetxe baten beharrei erantzun beharko lieken lokala izan behar da: kontzertuak egiteko ahalmena, autogestionatua… Esan digute autogestioaren istorioa ez zela zehaztu beharrik.

Kotte Ecenarro auzapezaren engaiamenduak garaipen bat irudikatzen du Gazte Asanbladarentzat?

Ez nuke jakingo erraten berri onak edo txarrak direnik. Egia esan, presiopean izan zen. Asanbladan hartzen ditugu erabakiak eta adostasun batera iristeko urduritasun handia sentitu genuen. Alde batetik, 18 hilabeteko epea luzea da eta ez dakigu nora iritsiko garen, baina egia da Gazte Asanbladaren historian ez garela inoiz hain urrun iritsi.

Gu erne egonen gara, baina, hala ere, segituko dugu gure bidea. Ez gara zain geldituko.