Kazeta

Eragindako samina aitortu du ETAk

Gatazka armatuan eragindako kaltea onartu du ETAk plazaratu duen azken adierazpenean. Ekintzek eragindako "hildako, zauritu eta biktimei, gatazkaren ondorioz kaltetuak izan diren heinean", errespetua agertu die: "zinez sentitzen dugu".

Armagabetzearen eguneko ekitaldia Baionan. (Iñigo URIZ/ARGAZKI PRESS)
Armagabetzearen eguneko ekitaldia Baionan. (Iñigo URIZ/ARGAZKI PRESS)

ETAren desegitea maiatza hasieran gauzatuko dela iragarri dute hainbat eragilek azken egunetan. Testuinguru horretan, armagabetzearen lehen urtemugaren data duen adierazpena plazaratu du ETAk. Agirian, bere ibilbide armatuan eragindako kaltea onartu eta gatazkaren ondorioak behin betiko gibelean utzi eta halakorik berriro ez errepikatzeko engaiamendua hartu du.

Borroka armatua iraun bitartean izandako sufrikarioa gogora ekarri du erakundeak. Samin horretan izandako ardura onartu du eta, bide batez, kaltetuei errespetua adierazi die. "ETAren ekintzek eragindako hildako, zauritu eta biktimei, gatazkaren ondorioz kaltetuak izan diren heinean, errespetua agertu nahi diegu. Zinez sentitzen dugu".

Gatazkan parte hartu duen orori ardurak aitortzeko deia luzatu dio. "Inork ezin du iragana aldatu, baina iragan hori desitxuratzea edo zati batzuk ezkutatzen saiatzea litzateke oraintxe etorkizunari begira egin ahal den gauzarik okerrenetakoa. Onartu dezagun guztiok izandako ardura eta eragindako mina. Ikuspuntu eta sentipen berberak ez izan arren, denok besteek ere izandako sufrimendua aitortu behar dugu, begirunez".

Bere aburuz, gatazka politikoak aspaldi konponbide demokratiko bat behar zuen. Erakundea sortu aitzin samina nagusi zela dio. Gernikako bonbardaketaren ondorengo belaunaldiak sentitutako bortxa eta arrangura atzean utzi eta ondorengo belaunaldiek beste etorkizun bat jasotzea nahi du.

Etorkizunari begira, berradiskidetzea Euskal Herrian egin beharreko lanetako bat dela uste du erakundeak. "Beharrezko ariketa da egia modu eraikitzailean azaleratzeko, zauriak sendatzeko eta halako sufrikariorik berriro gerta ez dadin bermeak eraikitzeko". Bere iritziz, gatazka politikoari konponbide demokratikoa emanez, "Euskal Herrian bakea eraiki eta askatasuna lortu ahalko dira".

Argibide oharra

Aipaturiko adierazpena izandako eztabaida prozesuaren baitan kokatu du ETAk. "Zinismoa" eta "hipokresia" alde batera utzita, bere adierazpena "zintzotasunez eta errespetu osoz" egiten entseatu dela nabarmendu du. Beste eragileen aldetik ere ariketa bera espero duela aipatu du. "ETAk argitua du zer egin duen. Hori azpimarratzea garrantzitsua iruditu zaigu, oraindik ere Euskal Herrian gertatutako indarkeriazko ekintza asko ez baititu inork onartu. Inork ez ditu argitu. Harago, ekintza horien arduradunek beren erantzukizuna ukatu dute".

Egiaren azaleratzea Euskal Herriko gizarte zibila, eragile eta borondate oneko ordezkari instituzionalen eskutik etorriko dela pentsatzen du ETAk. "Horretan jardungo direnek ETAren historian barrena ere egon daitezkeen argibideak aurkitu ahalko dituzte, eta ETAn aritutako kidegoa, bere ahalen arabera eta arduraz, ekarpena egiteko prest izango da".