EHZ festibala bertan behera gelditzen zela iragarri zutenez geroztik, jaso duten sostenguarekin "harriturik" daude gazteak. Euskal Herriko osoko herritar, kolektibo eta artistek babesa adierazi diete. Horren isla asteburuan zehar antolatu dituzten elkartasun ekimenak dira. Indar berriturik, gogoeta faseari eutsi eta eztabaidak abiatuko dituztela azaldu dute.
Iragan duten asteburu "kargatuan" emozioak "goiti-beheiti" ibili direla aitortu du Ion Irazabal EHZ elkarteko kideak. Teknikari eta aseguru etxeek festibala antolatzeko baldintzak betetzen ez zirela baieztatu ondoren, elkartasun deialdiari modu baikorrean erantzun dio Euskal Herriak. Euskal Herriak, bai. Txoko anitzetatik eta jatorri ezberdinetako elkartasun keinuak jaso ditu elkarteak. Horiek, guztiekin, gazteak "harrituak" daudela aipatu du.
Hala nola, Ttattola eta Kanboko gaztetxeko gaualdiez gain, igandean Donostiako Bukowskin artista multzo batek topo egin eta elkartasun doinuak plazaratu zituen. Baita karrikan ere, jendea lokalera ezin sartuz gelditu baizen. Halaber, Berri Txarrak taldeak 'Do it together', artisau garagardoa saldu eta etekinak EHZri emango dizkio. Gisa berean, Urretxu-Zumarragako Gaztetxeak ere besten karietara diru bilketa bat antolatu du.
https://t.co/JGDXyNVbiu
— Berri Txarrak (@berritxarrak) 2017(e)ko uztailak 3
'DO IT TOGETHER', artisau garagardoa, 6 latako kutxa salgai.
Etekinak @ehzfestibala-rentzat. #DITbeer pic.twitter.com/MC9Nvx5fnK
Zumarragako festekin batera ospatzean zaila zaigu joatea, baina miresten dugu @ehzfestibala Horregatik jada lortu ditugu 300€ txoznagunean!
— KUn KKinZona (@KUnKKinZona) 2017(e)ko uztailak 3
EHZren aldeko elkartasun erauntsia Bilboraino ailegatuko da uztailaren 5ean. Eñaut Elorrieta, Inun, Iratxe Mugire eta Josu Bergara beste hainbat artistekin arituko dira 20.00etatik aitzina Biba! Kulturgunean.
"Ohartu gara sostengua dagoela. Jendea prest dago laguntzeko. Kontent dira EHZren dinamikarekin. Ez genuen espero hein horretako erantzuna eta bihotzetik, denak eskertzen ditugu", erran du Irazabalek.
Dinamika azkartua
Festibala deuseztatzeko erabakia hartu eta, administratiboki txostena osatu behar dutela azaldu du kideak. "Asurantzak normalean bere gain hartuko ditu aurten engaiatutako gastuak. Ekonomikoki ez gara gaizkiago izanen, hori segur. Elkartearen geroa ez da zalantzan jarria", gehitu du.
Aspalditik elkarteak festibalak zein forma hartuko duen eztabaidatzeko prozesua abiatu zuen. Datozen asteetan orain arteko formatuan festibalak helburuak betetzen dituen eztabaidatuko dute. Asteburuan jasotako babesarekin, argi dagoena da, Euskal Herriak EHZ festibala aldarrikatzen duela.
"Entseatuko gara elkartasun hori beroan mantentzen eta zabaltzen jendeak gauzak antolatzen segi dezan", nabarmendu du gazteak. Udan zehar EHZ elkarteak berak ekimenak antolatuko dituela iragarri du Jon Irazabalek.