KAZETA.EUS webguneak Ipar Euskal Herriko eragileei txoko berri baten ateak ireki dizkie. ELEKA deitu atala plaza libre bat izango da kazetari, idazle eta irakasleentzat. Gaurkotasunezko gaiak jorratzeaz gain, norberaren pentsamendu eta hausnarketak azalduko dituzte parte hartzaileek.

Astelehen eta ostegunetan ELEKA saileko parte hartzaileen idatziak argitaratuak izanen dira. Besteak beste, Joseba Aurkenerena irakaslea, Franck Dolosor kazetaria, Ixabel Etxeberria irakaslea, Erramun Bachoc soziolinguista eta Hodei Barroso bertsolariaren testuak irakurgai izanen dira.

Bachocek bere lehen ekarpenean gaur egun Ipar Euskal Herrian gaurkotasun handia duen gaiaz idatzi du: "euskal elkargoa". Urtarrilean abiatuko den instituzio berrian euskarak izango duen lekuaz mintzo da. Ttitto Betbeder Euskal Irratietako arduraduna, berriz, Euskal Herriaren kontzeptuaz ari da: "aitzinatu ote dea? edo aitzinatuagoak ginen 'lehen"?".