Müsikaren Egünak mende laurden bat iganik

Hogei eta seigarren aldikotz, Urdiñarben iraganen da Müsikaren Egüna maiatzaren 22tik 24era.

Iulen Guirresse|20/05/2015 08:20|0 commentaires
Soule
Müsikaren Eguna belaunaldien arteko topaketa izan ohi da. (Iulen Guiresse)

Adin guzitako herritarrak biltzen dituen Bil Xokoa elkarteak antolaturik, euskal kulturaren eta munduko beste populuen kulturen algarrenganatzea du xedea maiatzaren 22tik 24era antolatua den Müsikaren Egünak. Festibal horretan, kanpoko edozein kulturari batzarri ona egiten bazaio ere, euskara lehen planoan ezartea saiatzen dute. Eta horren egiteko ehun bat laguntzaile dira hiru egunez ari.

Urte oroz bezala, ostiral arratsean, Chistera ostatuan hasiko da 9etatik goiti. Hor, sail artistiko askotatik datozen lau “taldek” haien ekoizpena taularatuko dute. Lehen aldikotz, Bizkaiko eta Xiberoko bertsolari batzuk, Tipul eta Putil antzerkilariak, Xiberoots musika taldea eta Xiberoko Kauteak elkartuko dira, denen arteko ikusgarri baten emaiteko. Gaualdi goxo baten pasatzeko aukera izango da bertsuan, musikan, antzerkian eta umore onean.

Larunbatari beti gai bat emaiten zaio eta aurten Urdiñarbetarrek Kantua hautatu dute. Horrela, goizeko 10etatik goiti, Alemanian atzemandako 100 urteko grabaketak entzuten ahalko dira baita Sü Aziaren kantore funtsa entzungai izanen da.

10ak eta erditako eztabaidak “kantuaren tokia gizartean” izango du gai nagusitzat. Bazkari bat proposaturik dateke ere bai arrestian igaranen den Haur Kantu Txapelketa beno lehen. Hau 3etan hasiko beita. 7ak eta erditatik goiti, Kaute Sinfoniak lagunturik, kantu herrikoiak algarrekin kantatzeko parada izanen du edonorrek. Horrela kantu berriak ikasteaz gain, botza galtzeko aukera ona izanen da. Arratseko 10etan, Gibelurdinek giro polita ezarten duen Bizkaiko taldeak kontzertua emanen du.

Igandean, 11etatik goiti, Dju Dju eta Aitzindariak elkarteek prestatutako dantza ikusgarria emanen dute. Eguerditatik goiti, Ezpela, Gaitamik eta B Band-ek karrikak animatuko dituzte haien musikei esker eta ordu batetatik goiti, ikastolako burasoek antolatutako axurki bazkaria proposatua izanen da. Hiruak erditatik haratago Wonder Brass Band (Tolosa), Pastor of Muppets (Bordale) ariko dira arresti guzian talde hauek taularen gainean ordezkatuko direlarik: Irazoki eta lagunak (EH), Acropolis Bye Bye (Grezia), Tapia eta Leturia (EH), Kaotiko (EH), Al'tarba / DJ nixon (Lyon).

Informazio praktiko gisa, erran behar da Donapaleutik, Garazitik eta Ligitik autobusak antolatuko dituztela (goizeko 11etan abiatzen eta gaueko 11etan sartzen). Izenak emaiteko, 05 59 28 31 17 zenbakira deitu edota xehetasun gehiagorentzat http://batmantxo.over-blog.com webgunera jo.