Kazeta

Euskal Herriaren burujabetza egitasmoa indartzera dator Telesforo Monzon eLab

Irailaren 12an Euskal Herrigintzaren laborategia izan nahi duen tresna berriaren aurkezpena egin zuten Bergarako abertzale ezaguna bizi izan zen Olaso Dorrean. “Barreiaturik dagoen inteligentzia kolektiboa saretzea eta Euskal Herriaren XXI. mendeko erronkei erantzutea” izanen da bere egiteko nagusia.

Iratxe Esnaola lehendakariak eta Urko Aiartza zuzendariak aurkeztu zuten Telesforo Monzon eLab.
Iratxe Esnaola lehendakariak eta Urko Aiartza zuzendariak aurkeztu zuten Telesforo Monzon eLab.

"Askatasun demokratikoak, aukera-berdintasuna eta gizarte inklusioa ardatz dituen Euskal Herri burujabea, hori da gure zerumuga". Hitz horiekin laburtu zuen Jose Luis Elkoro ezker abertzaleko militante historikoak eta Telesforo Monzonen lagun ere bazenak irailaren 12an Bergaran aurkeztu zen egitasmo berriaren xedea.

Telesforo Monzon Euskal Herrigintza Laborategiaren sustatzaileek ikusmira luzera begira jarri dute eta ez da gutxiagorako. Urko Aiartza zuzendariak garbi azaldu zuen testuingurua: “Euskal Herria bezalako herri txiki batek dituen erronkak ikaragarriak dira. Zer esanik ez bi estatutan eta hiru egitura administratibotan banatuta gaudela kontuan hartuta”.  

Hori dela eta, ekinbide berrien beharra jarri zuen mahai gainean Aiartzak, Euskal Herriaren bideragarritasuna bermatzeko tresna eta egiteko modu berriei erreferentzia eginez. Bere hitzetan, “Euskal Herriaren erronkei erantzuteko nahikoa gaitasun eta jakintza badugu. Inteligentzia kolektibo hori saretzea eta Euskal Herriaren XXI. mendeko erronkei erantzutea” izanen da argia ikusi duen tresna berriaren egitekoa.

Euskal Herria berrasmatzeko beharra

Iratxe Esnaola lehendakariak hitza hartu zuen segidan eta besteak beste, Monzon zenak defendatu zituen bi ezaugarriren gainean lan eginen dutela adierazi zuen: “laborategiak batasunerako eta elkarlanerako gunea izan nahi du: Euskal Herria beste norabide bati begira jarri nahi dugun guztion elkargunea”.

Euskal Herriak erantzun berritzaileak behar dituela konbentzituta mintzatu ziren Esnaola eta Aiartza, nazioarteko eredu aurreratuei so egin, baina gure herrian abian diren eraldaketa prozesuei erreparatzea eta elkarlana emendatzea ezinbestekoa dela adierazi zuten. Ildo horretan, "batzuetan proposamen zehatz eta adostuak besteetan eztabaida publikoan eragiteko ideia eta ekimenak" proposatuko dituztela iragarri zuten.

Gonbidatu andana bat Olaso Dorrean

Bergaran den XVI. mende hastapeneko Olaso Dorrea etxeak hartu zituen Euskal Herri osotik joandako eragile eta sektore anitzetako ordezkariak. Aniztasun horrek laborategiak egin nahi duen bidearen ezaugarriak isla ditzake, zalantzarik gabe.

Bertaraturiko ordezkari politiko eta instituzionalen izenean, han ziren Iker Elizalde eta Xabi Larralde (EH Bai), Andoni Ortuzar eta Mikel Burzako (EAJ), Arnaldo Otegi eta Maddalen Iriarte (EH Bildu), Arkaitz Rodriguez (Sortu), Xabier Barandiaran (Gipuzkoako Diputazioa), Jabi Asurmendi (Udalbiltza) eta Gorka Artola (Bergarako auzapeza), besteren artean.

Zabala izan zen oso arlo sindikal, sozial, kultural edo komunikatibotik hurbildu zirenen zerrenda: Xabier Anza (ELA), Garbiñe Aranburu (LAB), Jexux Olaziregi eta Alex Zenarruzabeitia (Gure Esku Dago), Paxkal Indo (Garapen Kontseilua), Mixel Berhokoirigoin (EHko Laborantza Ganbara), Iñaki Goirizelaia (PuntuEus), Aritz Otxandiano eta Joxan Alustiza (Gizabidea), Eduardo Barinaga (EITB), Enekoitz Esnaola (Berria), Iñaki Soto eta Juanpe Plaza (Naiz), Iñigo Uria eta Ekhiñe Atorrasagasti (Hamaika TB), Idoia Fernandez (EHU), Jean-Pierre Massias (Baionako Unibertsitatea), Idoia Peñacoba (Mondragon Unibertsitatea), Kepa Sarasola (UEU), Jose Antonio Rodriguez Sanz (Deustuko Unibertsitatea), Iñaki Dorronsoro (Eusko Ikaskuntza), Mixel Mendiboure eta Battitta Larzabal (Anai Artea), Lorea Agirre (Jakin), Joxe Mari Sors eta Juan Mari Larrarte (Elkar), Paul Bilbao (Kontseilua), Koldo Tellitu (Ikastolen Elkartea), Elena Beloki (Iratzar), Gorka Espiau eta Paul Rios (Agirre Lehendakari Center), Jagoba Zulueta (Ipar Hegoa), Unai Oñederra (Robles Ajangiz), Juan Maria Atutxa eta Irune Zuloaga (Sabino Arana), Pello Belan (Herrikoa), Chantal Torre (Hemen), Imanol Esnaola (Gaindegia) eta beste hainbat ere.