Lorentxa Beyrie: erabakia urriaren 15ean jakinaraziko dute

Prokuradoreak Lorentxa Beyrieren baldintzapeko askatasunaren kontrako helegitea aurkeztu ondotik, auzi berri bat iragan da Parisen irailaren 12an. Dei Auzitegiak bere erabakiaren berri emanen du urriaren 15ean.

Kazeta|2019/09/13 08:50|0 iruzkin
Guz_lorentxabeyrie_kanbo_gfauveau-2
Lorentxa Beyrie euskal presoaren aldeko elkarretaratzea Kanbon. ©Guillaume FAUVEAU

Lorentxa Beyriek aurkezteriko hirugarren baldintzapeko askatasun eskaera da. Zigor Aplikazioen Auzitegiak eskaera onartu ondotik, segidan helegitea aurkeztu zuen prokuradoreak. Irailaren 12an Parisen iragan den auzi berrian jakinarazi dutenez, deliberoa ezagutaraziko du justiziak urriaren 15ean.

Egun, bere herritik 680 kilometrora dagoen Roanneko espetxean dute Lorentxa Beyrie. Dagoeneko 18 urte egin ditu kartzelan 2021ko urrian ezarritako zigorra osorik beteko lukeen presoak, Naiz atariak bildu duenez.

2012az geroztik aske egoteko baldintza guztiak betetzen baditu ere, Beyrieri behin eta berriro ukatu diote baldintzapeko askatasuna, "terrorismoaren aurkako parketak" blokeatu baitu bide hori.

Roanneko espetxe berean aztertu zuen Zigor Aplikazioen Auzitegiak bere hirugarren askatasun eskaera, iragan ekainaren 21ean. Horrelako kasuetan presoak bideokonferentziaren bidez parte hartzen du auzian, baina Beyrieren defentsak hala eskatuta, ekaineko auzia kari epaileak espetxera bertaratu ziren.

Beyriek 2017ko abenduan egin zuen baldintzapean aske ateratzeko hirugarren eskaera. 2013an eta 2016an aurkeztu zituen aurreko bi prozedurak baztertu zituen frantses justiziak.

Ordurako bere jarduera armatua baztertua zuen iazko maiatzean desagertu zen ETA erakundeak. Hala eta guztiz ere, prokuradoreak "delitua berriz errepikatzeko" ustezko arriskua argudiatu du behin eta berriro kanboarra presondegian atxikiz.

Are, auzitegiak baldintza zorrotzak ezarrita -18 hilabetez eskumutur elektronikoa eramatea agindu zuen jujeak- askatasun eskaera aintzat eman zuenean, joan zen uztailean, prokuradoreak horrela ere uko egin zion kanboarra askatzeari. Hori dela eta William Bourdon Beyrieren abokatuak, euskal presoaren aurkako "jazarpen judiziala" salatu zuen.