Idokiko ekoizleak etengabe eskaintza berritzeko bidean

Idokiko ekoizleen produktuen eskaintza etengabe ari da garatzen. Elkarteak hainbat formakuntza proposatzen ditu beren eskaintza zabaldu dezaten, erosleen eskaera zein beharrei egokitzeko helburuz.

Iurre BIDEGAIN|2019/09/13 15:30|0 iruzkin
Loading player...

"Berritu ala hil" dio esaera ezagun batek. Idokiko ekoizleek formakuntzetan parte hartzen dute produktuen eskaintza garatzeko xedez. Elkarteak hainbat ikastaro proposatzen ditu eta horiei esker ekoizleak bezeroen eskaera berrietara egokitzen dira.

Etxaldeko produktuen adituek ikastaro horien gidaritza ziurtatzen dute. Azken urte hauetan, ikasketa horietan gasna motak jorratzeaz gain, haragia, fruitu zein barazkiak, eta produktu kosmetikoak edo erailegikoak ere ekoizten erakutsi dute.

Horretaz ongi daki Azkaineko ekoizlea den Mikela Autxainek. Erlezain honek bere produktuak merkatuetan saltzeaz gain, hainbat ikastaro antolatzen ditu bere etxean. Urteetan zehar bere eskaintza etengabe arraberritu duela azaldu du. Hain zuzen, berrogeita hamar erlauntzekin hasi eta kopurua handituz eta ekoizpena garatuz joan da. Hastapen batean soilik eztia egiten bazuen ere, gaur egun ezti mota andana bat eta xaboiak ere saltzen ditu.

Antton Brustek berriz, ibilbidea hasi besterik ez du egin, baina motibazioa ez zaio falta. Hogeita hiru urteko gazte honek bere burasoekin batera instalatzea espero du urte hastapenean. Naturalki egin duen hautu bat dela dio. Ttipi-ttipitatik laborantzako eginkizunei lotua da eta ofizioak bizi duen egoera kaskarra ikusita urratsa ematera animatu da.

Formakuntza ezberdinetan parte hartu du gasna freskoa ekoizteko. Orain, erronka berri bati aurre egin nahi dio: izozkien ekoizpena. Mementoz, saiakera fasean da eta bere familia osoa horren lekuko da bazkarietan. "Nire proiektua azaldu dietenean nire burasoei, erantzuna oso baikorra izan da. Beren iritziz nire ukitu pertsonala ekar dezaket familiako proiektuari", aipatu du irri handi batekin.

Nathalie Eyhérabide Azkarateko ekoizlea fase berdinean da. Bere ustez, produktu berri bat eskaintzeko gakoa errezeta egokia atzematea da. Jogurtak ekoiztu nahi ditu heldu den urtetik aitzina eta justuki errezeta ideal hori bilatzeko lanean ari da. Bere erranetan, produktuen dibertsifikazioa ez da bakarrik turistek galdegiten duten zerbait, baizik eta tokiko bezeroek ere eskatzen dutena.