Mugikortasuna hobetzeko lanak Hendaiako tren geltoki inguruetan

Irailaren 16tik 2019 urte bukatu bitartean, Hendaiako tren geltokia eta inguruko karrikak aztoratuko dituzte abian jarriko diren lanek. “Elgarrekin” proiektuaren bidez autoaren alternatiba diren garraiobideen arteko loturak indartzeko gunea sortuko dute.

Kazeta|2019/09/12 07:35|0 iruzkin
Euskotren
Euskotrenen egungo geltokia eraitsi eta berria 2020an eraikiko dute. @ Isabelle Miquelestorena

Bidasoa zeharkatzen duten Hendaiako hiru zubietatik (Santiago, Pausu eta A63  autobidea) urtean 45.000 auto eta udan 90.000 igarotzen dira. Alta, tren eta garraio publikoen erabiltzaileak 2.000 inguru dira. Hori dela eta, heldu den irailaren 16an urte bukatu arte iraunen duten lanak hasiko dituzte Hendaiako tren geltokian eta ondoko karriketan.

“Elgarrekin” proiektuaren helburu nagusia SNCF eta Eusko Trenen geltokietarako irisgarritasuna hobetzea eta beste mugikortasun garraioak konektatzea da. Horien artean dira TER eta Topoa, autokarrak, eta Txik Txak sareko autobus eta bizikletak. Gisa horretan, auto pribatuaren alternatibak azkartu nahi dituzte, trena eta garraio publikoa erabiliagoak izan daitezen.

Trafikoan eta eguneroko bizian eragina

Honek guziak hendaiarrengan eta eguneroko erabiltzaileengan eragina izanen du. Erraterako, De Gaulle Jeneralaren etorbidea hetsia izanen da bi norabideetan eta ezingo dira ibilgailuak aparkatu. Autoak azaroaren 11 eta deportatuen karriketara desbideratuko dira.

Lanek irauten duten artean, bertan auzotarrek ez dute haien lurrazpiko aparkalekuetan sartzeko arazorik eta oinezkoak garatzen joango diren bidexkan ibili ahalko dira. Komertzioak eta geltokiko aparkalekua ere idekiak izanen dira. Bestetik, autobus lineak mantendu eginen dira baina moldaketa batzuekin: `SNCF geltokia´ 200 metro urrunagora mugituko da, nazioarteko zubira.

Hainbat eraikin botako dituzte

Lanen lehen fase honetan, ur saneamendu sarea bereizi eta ur edangarrirako zabalpen sarea indartu nahi dute. Hortaz, De Gaulle etorbidearen 300 metroetan urari loturiko azpiegiturak egokituko dira, argindar eta telefono sareetako lanak egitearekin batera.

Urrirako SNCFren 21 eraikina eta mediku-gela eraitsiko dituzte, gisa horretan atari zabal sortuko dute, irisgarritasuna eta geltokien arteko konexioa hobetzeko. Euskotrenen egungo geltokia azaroan botako dute, eraikin berria 2020ko udarako aurreikusia delarik. Anartean, De Gaulle etorbidetik Behobia karrikatik behin-behineko geltokia ezarriko dute.