Etxebizitza zerga desagertuko da, baina ez hautetsien arrangura

Herrientzat baliabide garrantzitsua den etxebizitza zerga osoki ezeztatuko da 2023an. Hautetsiak Gobernu frantsesak hurrengo finantza legean galera hau konpentsatzeko zer proposatuko duen zain dira.

Goizeder Taberna|2019/09/10 11:01|0 iruzkin
Med_taxehabitation_baiona_gfauveau-1
Etxebizitza zergak herriei funtzionamendu gastuak hein handian betetzea ahalbidetzen die. © Guillaume FAUVEAU

Etxebizitza zerga laster ez da posta-kutxetan izanen, bai haatik mezuetan. Etxeen %80ak 2018an %30eko zerga arintzea izan ondotik, heren batean apalduko da berriz. Emmanuel Macronen erreforma enblematiko honek etxe guzientzat zerga hau osoki kenarazi behar luke 2023an. Onespen soziala duen neurria da ezbairik gabe, baina hautetsien artean zalantzak sortzen ditu.

Auzapezek ez dakite zerga desagerpen hau nola konpentsatuko den. 2023aren beldur dira, beren beharrei egokituriko fiskalitateari loturiko baliabideak eskuetatik ihes egiten ari baitzaizkie. Urte hau bukatu aitzin, prestaketan den 2020ko finantza legeak galdera nagusi horri erantzun beharko dio.

Estatu frantsesak zergaren ezeztatzea konpentsatzeko herrientzako hornidurak hobetu baditzake ere, hautetsiek baliabide berrien jarraikortasunerako eta garapenerako bermeak galdegiten dituzte. Etxebizitza zerga dinamikoa da eta etxebizitzen emendapena kontuan hartzen du. “Hornidurek segitzen ez badute, irabazi esklerotikoekin eta apaltzera joko duen eroste ahalmenarekin bukatuko dugu”, dio bere herriaren autonomiaren galera deitoratzen duen Arnaud Fontaine Ozaraine-Erribareitako auzapezak.

Horniduren apaltze erregularra

Hirien funtzionamendurako etxebizitza zerga irabazi garrantzitsua da, maileguak soilik inbestimenduak egiteko galdegin baititzakete. Pirinio Atlantikoetako auzapezen eta presidenteen elkargoaren arabera, herri baten baliabide fiskalen %32a suposatzen du. 2020an Estatu frantses osoan 26.300 milioi izanen direla aurreikusia da.

Zerga hori kentzea horniduren gutxitze aldi baten baitan kokatu behar da. Orokorki begiraturik, 2014 eta 2019 urteen artean gobernu ezberdinek Pirinio Atlantikoetako departamenduan %42an apaldu dituzte. “Irabazi orokorren %10 galdu genuen”, adierazi du Fontainek.

Maniobratzeko tartea ere murrizten dela diote hautetsiek. “Herri handietan erabakiak hartzen ahal ditugu, baina ttipietan, 100.000 euroko aurrekontu batekin... gastu arruntak ordaindu ondotik, ez da deus gelditzen”, berretsi du auzapez xiberotarrak. “Estatuak gure baliabideak murriztu nahi baditu, hezurra karrakatu beharko dugu”. Etxebizitza zergaren erreforma 2018an abiatu zen. Ordutik, txaleko horien krisia dela eta, Frantziar estatuaren eta bere baitako lurraldeen arteko arrakala emendatu egin da.