Laborantza biologikoaren hitzordua igandean Lekornen

Heldu den igandean, irailak 8, Asunak tokiko laborantza solidario eta biologikoaren topaketen 19. edizioa ospatuko da Lekorneko Garro jauregian.

Kazeta|2019/09/06 13:45|0 iruzkin
Ber_asunak_8025
Aurtengoa topaketa biologikoen 19. edizioa izanen da. © Aurore LUCAS

Hemeretzigarren urtez jarraian eginen dira laborantza herrikoia eta biologikoa oinarri dituen Asunak topaketak. Biharko Lurraren Elkarteak (BLE) eta Emazteek Diote taldeak antolaturik, aurtengo edizioan aldaketa klimatikoari eta bioaniztasunean gertatzen ari den apaltzeari jarri nahi diote arreta. Irailaren 8an Lekorneko Garro jauregian antolaturiko mahai-inguru eta mintzaldiek gaiaren trataerari erantzun nahi diete, goizeko 9.30tatik arratsaldeko 17.00ak arte prestaturiko egitarau zabalaren barnean.

"Laborantza eta klima" izanen da 10.30tatik aitzina eginen den mahai-inguruan bien arteko harremanak nolakoak izan behar diren gogoetatuko dute Quentin d'Hoop Saubrigueseko baratzezainak eta Sébastien Laumond agronomoak. Tenore berean, beste saio batean "ura eta energia etxaldeetan" gaia tratatuko dute, bertan zazpi laborarik etxaldeetan erabili ohi dituzten energia berriztagarrien berri emanen dutelarik.

Tailer ezberdinak ere proposatu dituzte antolatzaileek. 11.30ean erleen mundua ezagutzeko Jean-Pierre Gogny erlezainak elikadurarako eta klimarako erleek duten garrantzia azalduko du. 12:15tan berriz, landareekin jantziak nola tindatzen ahal diren erakutsiko du Camilles Capdevillek, bereziki haurrei zuzendutako saioan.

Egun osoko azoka ekologikoa

Halako hitzordu batean tokiko produktu ekologikoez osaturiko bazkaria ezin da falta. 13.00etan hasiko da helduentzat 18 euro/eusko eta haurrentzat 9 balio duen otordua. Lekua erreserbatu nahi duenak 06 34 99 39 15 telefonora deitu besterik ez du.

Arratsaldean ere izanen da aktibitaterik. 15.30ean Amandine eta Aymar Bourguy baratzezain ekologikoek kabalekin lur lanak nola egin erakutsiko dute. Tenore berean, inguruetan den SCIC Garro etxaldeak bere ateak idekiko ditu nahi duenak bisitatu ahal izateko eta EHKO kolektiboa Euskal Herriko kontsumo ohiturez arituko da, azken urteetan herritarrak geroz eta gehiago antolatzen ari direla erakutsiz.

Egun osoan zehar Euskal Herri osotik jindako ekoizleek haien produktuak erakusgai eta salgai ezarriko dituzte azoka ekologikoan, Tefalo musika taldeak animatuko duelarik eguna.