“Zu hemen zaude, AEK ere bai”, euskara ikasteko matrikulazio kanpaina abian

Ikasturtearen sartzearekin batera, irailaren 3an AEKk matrikulazio kanpaina aurkeztu zuen Gasteizen. Euskal Herri osoan 100 gau eskola baino gehiagotan izanen da euskara ikasteko posibilitatea, baina baita beste tresnei esker ere. Irailaren 17an ate idekiak izanen dira gau eskoletan.

Kazeta|2019/09/05 07:50|0 iruzkin
Bb_20190903805859
Aurtengo Korrika Gasteizen bukatu dela eta, AEKko arduradunek Arabako hiriburua hautatu zuten kanpaina berriari hauspoa emateko.

AEKk euskara ikasteko proposatzen duen eskaintza zabala aurkeztu zuen Gasteizen. Erakunde euskaltzaleak “Zu hemen zaude, AEK ere bai” leloa hautatu du abian den matrikulazio kanpaina berrirako. Alizia Iribarren koordinatzaile nagusia eta orain arte langintza horretan aritu den Mertxe Mugika arduratu ziren kanpainaren berri emateaz, ondoan Artezkaritza Kontseiluko kideak zituztela.

Kanpaina abian da eta irailean zehar eman beharko da izena. AEKko arduradunek nabarmendu dutenez, informazioa eskuratzeko biderik errazena tokian tokiko gau eskolarekin harremanetan sartzea da. Ipar Euskal Herrian hogei bat badira. Web atariak ere informazio anitz eskaintzen du euskara ikasteko interesa duen ororentzat.

Gau eskoletan izaten diren ohiko eskola ikastaroekin batera, autoikaskuntza, online ikastaroak, barnetegiak, mintzapraktikak, normalizazio plangintzak eta itzulpen nahiz zuzenketa zerbitzuak eskaintzen ditu helduen euskalduntze eta alfabetatzeaz arduratzen den erakundeak. Ikasleek hainbat abantaila ere izanen dituzte, tartean Aizu! aldizkaria urririk jasotzea edo udako barnetegietan %25eko beherapena, besteren artean.