“Atxik kuraia”: migranteen hitza eta sormena plazara

Euskal Herria Zuzenean festibalaren baitan sorturiko ikusgarria Lapurdiko, Baxe Nafarroako eta Xiberoko hainbat herritan eskaintzen ari dira agorrilaren 28tik aitzina. Belgikako Trans en Danse konpainiaren laguntzarekin ondutako proiektuan migranteak dira protagonistak.

Kazeta|2019/08/29 09:05|0 iruzkin
Atxik_kuraia
"Atxik Kuraia" ikusgarriko partaideak, errepika batean. © Guillaume FAUVEAU

“Atxik kuraia” du izena joan den ekainaren bukaeran ospatu zen EHZ festibalaren karietara erdituriko ikusgarriak. Landu ziren tailerretan bost gai jorratu ziren Irisarrin, horien artean migrazioarena, Euskal Herrian harrera egiten duten hainbat elkarteren partaidetzarekin. Ikusgarria ere bertan izan zen presentatua eta orain, agorrilaren 28tik irailaren 1era Euskal Herriko txoko ezberdinetan ematen ari dira.

Proiektuak usu ikusezinak diren migratzaileei hitza eta lekua emateko xedea du. Gisa horretan, antzerki, dantza eta kantuen bidez herritar hauek izan ohi dituzten zailtasunak erakutsi nahi dituzte eszenaren gainean. Belgikako Transe en Danse konpainiak lagundurik, Euskal Herrian bizi diren hainbat migratzailek parte hartu du egitasmo honetan.

Agorrilaren 28an Atharratzeko Prefostan estreinatu ondotik, agorrilaren 29an Donazaharreko Lutxiborda emanen dute ikusgarria, 20.00etan. Biharamunean ber tenorean Kanboko gaztetxeak hartuko du lekukoa eta agorrilaren 31n larunbatarekin, Irisarriko Ospitaleara itzuliko da “Atxik kuraia”, 16.00etan. Bost egun hauetako azken emanaldia irailaren lehenean izanen da, Ortzaizeko zinema gelan, arratsaldeko 15.00etatik landa. Sartze urririk izanen da.