Haurrak pozez zoratzen!

Baionako bestetako usaiari jarraituz, ostegunekoa haurrei eskainitako eguna izan zen. Urtero bezala, milaka pertsona Leon Erregea iratzartzeko zain egon ziren, ondotik Poterne lorategira ongi pasatzera eta %100 tokiko janaria bazkaltzera joateko.

Anaiz Aguirre Olhagaray|2019/07/26 09:02
Guz_reveilroileon_baiona_gfauveau-7
Ostegun eguerditan milaka haurrek Herriko Etxearen aitzineko plaza bete ohi dute. © Guillaume FAUVEAU

Uztailak 25, osteguna, goizeko 11:55ak. Milaka haur Baionako Herriko Etxeko balkoira begira ziren, lotan zegoen Leon Erregea noiz iratzarriko zain pazientzia erdi galduta. “Leon, Leon!” oihuka hasi ziren Askatasun plazan bildutakoak. Horien artean, bere amarekin Euskal Herrian oporretan den zazpi urteko Gabinek begiak dirdiratsu zituen, lehen aldikoz ikusiko baitzuen hain ospetsua den ekitaldia.

Txokolategilea, gobernatzailea, medikua, mariskala, faboritoa... Ospakizun honen atarikoan, monarkaren gorteak Herriko Etxearen aitzinaldera desfilatzen du, erregearen gaiteroen doinuek lagunduta.

“Xutik, xutik!” diote Lucie, Margot, Gabin eta Emma haurrek, Leon erregea iratzartzeko zer erran behar duten ongi jakinik. Eguerdiko hamabietan puntuan, kolore guzietako konfetiak airean hegaka zirela, azkenean Baionako maskotak bere agerraldia egin zuen balkoian. Haurrak pozez zoratzen ziren, hunkiturik.  

Miam Idoki

Leon Erregea iratzarririk, bazkaltzeko eta ongi pasatzeko mementoa heldu zen. Urtero, 5.000 haur inguru Poterne lorategira joaten dira, egun horretan parkea osoki haientzat prestaturik baita. Aisialdia, kontzertuak, jokoak... denetarik zuten. Eta baita Miam Idokiren standean jateko aukera ere.

“Duela bost bat urte auzapeza aitzineko hornitzailearekin janari ainitz bota behar izaten zela ohartu zen”, dio Patrick Sallaberry Idokiko presidenteak. Elikagaien behar gabeko xahutzea ekiditeko “gozoa baino zerbait gehiago” eskaintzea da xedea. Desafio honekin ekin zion 2014an Euskal Herriko laborarien sareak.

Emaitza: ordu eta erdi batean han zirenek 30-40 laborarik zerbitzaturiko abantzu 1.000 “etxeko hanburgesa” eta 600 ogitarteko jan zituzten. Idoki ezagutarazteaz gain, gazte-gaztetatik bestazaleengan hobeki jateko kontzientzia pizteko balio lezake.