Migranteekiko elkartasunez, Lagun Alai koruak Gamarten kantatuko du

Duela sei urte Baigorrin sorturiko Lagun Alai korua ikusteko parada izanen da Gamarten uztailaren 27an. Etor Bide migranteei harrera egiten dien elkarteak antolatu du kantaldia.

Kazeta|2019/07/24 07:35|0 iruzkin
Lagun_alai_gernikan
Lagun Alai korua Gernikan eskainitako kontzertu batean. © Herria

Lagun Alai koruaren kontzertua Gamarten iraganen da uztailaren 27an, 21:00etan. 2018ko uztailean sorturiko Etor Bide elkarteak antolatu du gaualdia. Elkarteak Garazi-Baigorri-Iholdi-Oztibarre eskualdetik pasatzen diren edo bertan gelditzen diren migranteak laguntzen ditu. Orain arte iraunkorki 7 pertsona lagundu ditu, guziak afrikar jatorrikoak.

Koruak sei urte egin ditu. Lagun talde ttipi batek elkarrekin kantatu nahi zuela eta, korua osatzea deliberatu zuten. Egun 47 dira Baigorritik eta inguruetako herrietatik jinda koru honetan biltzen diren pertsonak. Egunez egun errepertorioa emendatzen ari dira eta iaz 17 kanturekin CD bat ere aurkeztu zuten.

Kontzertua elkarteak daraman desmartxaren baitan kokatzen da. Orain arte berrogei harpidedun inguru dituzte eta urte osoan zehar aktibitate ainitz egin dituzte dirua bildu eta migranteek behar duten harrera segurtatzeko.