Berritasunez josia baina erne heldu da Baztandarren Biltzarra

Baztandarren eta euskaldun guztion hitzordua izan nahi duen Baztandarren Biltzarra errezibituko du Elizondok uztailaren 21ean. Krisi larri bat gainditu ondotik, erne aitzina doan ekimenean hainbat berritasun proposatuko dituzte. Horien artean, Euskal Herriko zazpi probintzietako musika eta dantzarien parte hartzea eta AEBtik etorritako euskal etxeen ordezkarien etorrera.

Iurre BIDEGAIN|2019/07/19 07:05|0 iruzkin
Img-20190628-wa0007
Uztailaren 21ean ospatuko duten Baztandarren Biltzarraren aurkezpena. (BAZTANDARREN BILTZARRA)

Gogotsu baina erne. Iaz kinka larrian egon ondoren, kide berrien indarrari esker aurrera egitea lortu zuen Baztandarren Biltzarrak. Indarberrituta itzuli zen, baina hala ere, laguntzaile berriei parte hartzeko deia luzatzen segitzen du herri ekimenak. "Besta bai, baina lana ere bai" mezua txoko guztietara zabaldu nahian dabil elkartea, aurrera segi dezan besta horren ereduan sinesten duen ororen laguntza beharrezkoa dela azpimarratuz.

Elizondok programa aberatsa eta berritasunez josia errezibituko du heldu den igandean. Berrikuntza bera afixa dela azpimarratu du Naiara Elola Baztandarren Biltzarra elkarteko kide berriak. Irudi tradizionaletik urrundu eta Karmele Gomezen sinestesiari lekua utzi diote aurten. Tokiko artista honek Baztango irrintzi bat irudi bilakatu du seigarren entzumenari esker. Anitzentzat ezezaguna den entzumen hori azaltzeko hitzaldi bat eskaini zuen badira aste batzuk Elizondon bertan.

Aurtengo hitzorduan gonbidatu berezien bisita jasoko du ospakizunak. Ameriketako Estatu Batuetatik etorritako lau euskal etxeren ordezkariak Baztandarren biltzarrean presente egonen dira. "Baztanekin lotura duten pertsonak dira. Hots, beren senideren bat hemengoa da", azaldu du kideak. Gonbidatu horiek Euskal Herriko zazpi probintzietako dantzariek eta musikariek proposaturiko ekimenekin gozatzen ahalko dute. Hori baita besta herrikoiaren helburua: euskaldun guztien topaleku bilakatzea.

Halaber, ingurumenaren alde egiteko xedez, aurten "esperimentu gisara" pixatoki jasangarriagoak instalatuko dituztela aipatu du Elolak. "Era berean, Baztango ekonomia sustatzeko, herri bazkariaren baitan tokiko produktuei lehentasuna emanen diegu", nabarmendu du.

Eguerdiko herri bazkaria baino lehen, 10.30ean karrozen desfileari hasiera emanen diete. Iaz Altsasuko burasoek ireki zuten desfilea, aurten, ordea, Bidelagun elkartearen hogeita bost urteak omenduko dituzte. Baztango elkarte honek hainbat motako bazterkeria jasaten dutenei laguntza ematen die. Justuki, Naiara Elolak bazkaria baino lehen herriko plazan iraganen diren mutil-dantzak azpimarratu ditu. "Inor baztertzen ez duen dantzen alde gaude", nabarmendu du.

Arratsaldeari begira, elkartearen mezua eta desfilearen irabazleen berri eman ondotik, dantzaldien txanda izanen da gorputzak iraun arte.