Macronen potreta kendu du Bizik Bardozeko herriko etxetik

Bizi mugimenduak Bardozeko herriko etxean zergoen Emmanuel Macron presidentearen argazkia hartu du uztailaren 11n. Ekintza honen bidez, larrialdi klimatikoaren kontrako neurriak hartzea eskatu dio Gobernuari.

Haritz Larrañaga|2019/07/11 13:53|0 iruzkin
Bizi
Bizi mugimenduko kide bat Bardozeko udaletxean Macronen argazkia kentzen. Bizi!

Otsailaren 21ean Bairritzeko Herriko Etxetik Emanuelle Macronen potreta kendu zuten Bizi mugimenduko kideek. Horren ondotik, Maule, Uztaritze, Donibane Garazi, Bidarte, Arrangoitze, Getaria, Donibane Lohizune eta Senpereko herriko etxeetan ere gauza bera egin zuten, eta gaur Bardozeren txanda izan da, Naiz atariak azaldu duenez.

Artean, Hendaia, Biriatu eta Urruñako herriko etxeetan ere Macronen argazkiak kentzen saiatu ziren, baina ekintzaileek ez zuten haien helburua lortu, Poliziak herriko etxeak zaintzen baitzituen.

Parisen 2015. urtean Nazio Batuen bilkuran (COP21) klima aldaketan eragiteko hartutako konpromisoak ez dituela betetzen salatzeko hasi ziren Macron presidentearen argazkiak udaletxeetatik kentzen. Kanpaina hau abiatu zenetik atxilotu ugari izan dira Estatu frantsesean, eta baita Ipar Euskal Herrian ere.