G7 Blokatu eta G7 Ez!, txanpon bereko bi aldeak

Laurent Thieulle ekologia ingeniaria eta G7 Ez! plataformako kideak MEDIABASKek egindako galderak erantzun ditu. Bere hitzetan, sortu berri den G7 Blokatu kolektiboa ez dago plataformarekin kontraesanean. Helburu berdinak dituztela uste du.

Anaiz Aguirre Olhagaray|2019/07/10 19:25|0 iruzkin
Capture_d%e2%80%99e%cc%81cran_2019-06-24_a%cc%80_17.22.33
G7 Blokatu kolektiboak desobedientzia zibil baketsua erabiliz gailur ofiziala salatu nahi du. ©Marisol Ramirez

Zein da zuen posizioa G7 Blokatu kolektibo berriaren aitzinean?

Laurent Thieulle: Hauek G7 bitartean desobedientzia zibilaren inguruan indarra egin nahi zuten pertsonak dira. Plataformaren baitan posizio hau onartu izan genuen eta besteak beste, agorrilaren 25ean eginen dugun ortzadar* eremuarekin gauzatuko dugu. Honek erran nahi du kolektibo honek plataformaren ikuspegiarekin bat egiten duela, baina ez dago bere baitan antolaturik. Ez dugu urrunago joateko baliabiderik, edo barne mailan politikoki edo antolaketari dagokionez. Beraz, G7 garaian desobedientzia zibilaren prozesua ahalik eta gehien bultzatu nahi duten pertsonen talde bat da.

Hortaz, bi ikuspegiak osagarriak al dira?

Ez gaude elkarrekiko oposizioan. Egia da G7 Ez! plataformak ez duela Blokaturen ekintzen inguruko komunikaziorik eginen. Bestetik, kolektibo hau osatzen duten pertsonek aurkeztutakoaren arabera, plataformak dituen helburuekin bat egiten dute. Hots, G7 hau alferrikakoa eta toxikoa dela, bereziki desobedientzia zibila baketsuki erabiliz. Kontra-iraultza bat antolatzea ez da kontua.

Nolako harremanak ditu plataformak prefeturarekin?

Arras pisuak kontsideratzen ditugun oztopoak eta gehiegizkoa iruditzen zaigun plana ezarri zuten. Lekua aurkitzeko sobera denbora galdu genuen (oharra: Urruñako Nestlé udako gunea izandakoa). Oraingoz, prefeturako zerbitzuekin adimenez ongi ari gara lanean, baina bistan denez ez gaude ikuspegi berean. Guk argiki G7 baliogabetu eta gailur hau desastre bat baizik ez dela frogatu nahi dugu. Alta, ahalik eta lan gehien egin nahi dugu kontra gailur honetara etorri nahi duten pertsonek eta militanteek gurekin bat egin dezaten permititzeko. Proposatzen diren kanpalekuen, konferentzien eta ekintza baketsuen parte izateko, hain zuzen.

Kontra gailurra atxikitzeaz baikorra al zara? Nola ikusten duzue sistema poliziala egungo testuinguruan?

Ez gara ez baikorrak ez ezkorrak. Prefetak badaki kontra gailurra nola eta zergatik antolatuko dugun. Noski, prefeturak eta estatuko zerbitzuek egindako adierazpenekin aski kezkatuak gara. G7 gailur denboran Schengeneko akordio batzuk berrikusteaz edo ustezko arazoak aurreikusteko ez dakit zenbat mila polizia bidaltzeaz, horien artean. Hau guzia nola antolatuko duten jakiteko zain gara. Edozein mementoan izaten ahal da prefeturak hastapenetik negoziatu izan ditugun dispositibo guziak ezeztatzea. Hau Hanburgon gertatu zen.

* Agorrilaren 25ean igandearekin, eguerdian G7 Ez! Plataformak ortzadar eremua eratu nahi du manifestazioen debekuen kontra. Angeluko, Baionako eta Biarritzeko (eremu gorri eta urdinetik harago) zazpi plazetan iraganen da.

ERLAZIONATUTAKO ALBISTEAK