Berritasunez josita heldu dira Baionako bestak

Iaz martxan jarritako besten ordainketa sistemari esker, 1,3 milioi euro eskuratu zituen Baionako Herriko Etxeak. Horri esker, segurtasun kostuari aurre egiteaz gain, uztailaren 24tik 28ra iraganen den programaren baitan proposamen berriak eginen ditu.

Maite UBIRIA|2019/07/10 07:00|0 iruzkin
Baiona_bestak
Baionako jai-egitaraua aurkezteko agerraldia. @GuillaumeFAUVEAU

Herriko Etxeak eta besten antolaketaz arduratzen den batzordeak zezen zaleei eta gaskoi hiztunei protagonismo berezia eman die aurtengo jai egitarauaren aurkezpen ekitaldian, Naiz atariak azaldu duenez.

Hartara Peña Taurina-ren lokalean, Santespiritu auzoan, aurkeztu dituzte bost egunetako ospakizunek ekarriko dituzten berritasun nagusiak eta, horren ondotik, hemendik aste gutxitara Baionako karriketara jauziko den erraldoi eta buruhandien konpartsako kide berriek lagundurik, desfile txikia egin dute Gaskoiaren Akademiako egoitzaraino, bertan aperitifa eskainiz.

Baionako hirian bere aztarna utzi duten lau pertsona ezagunen ibilbideari gorazarre egiteaz gain –Didier Deschamps futbol entrenatzailea, Josette Erramun Merkatu ostatuaren jabea, Jean Codega harakina eta Michou Padrones ilustratzailearen antza hartu dute buruhandi berriek– konpartsa kide berriekin osatzeko hautu horrekin 1932. urtean lehen aldiz ospatu ziren bestetako tradizioa berreskuratzeko nahikeria azaldu dute antolatzaileek.

Auto hiltzaileak gelditzeko sistema

Aurtengo bestek 3 milioi euroko buxeta izanen dute. Dirutza horretatik heren batek segurtasun egitasmoa ordaintzeko baliatuko dute.

Bestak ordaintzeko ereduak, alde batetik, eta hiriko orografia bestetik, segurtasun perimetroa ezartzen laguntze badute ere, urte batetik bestera segurtasun egitasmoak berritzen dituzte.

Aurten «auto hiltzaileak» oztopatzeko BAAVA dispositiboa emanen dute planta. Hesi berriak ezarriko dituzte hiriguneko hiru sarbideetan.

Nizako atentatua burutzeko ibilgailua baliatu zutela gogoan hartuz, azaldu dutenez, segurtasun tresna berriak 18 tona bitarteko ibilgailuak geldiarazteko gaitasuna dauka.

Zehazki, Santespiritu auzoan, Alsazia eta Lorrena bulebarrean eta Chanoine-Lamarque etorbidean plantatuko dituzte kolore horia duten hesi mugikorrak.

Iaz bezala, segurtasuna bermatzeaz gain jaietako iraunkortasun ekonomikoa bermatzeko xede, 8 euro ordaindu beharko dituzte ostegun eta igande bitartean Baionako besta giroaz gozatzera hurbilduko diren kanpoko bisitariek.

Aurten, sarrera hori ordainduta eskuratzen den eskumuturra berde kolorekoa izanen da.

Iaz 1,3 milio –750.000, ordainketa sistema ezartzeak ekarri zuen kostua kenduta– eskuratu zituen hiriak sistema horren bidez.

Jean-René Etchegaray auzapezak gaur azaldu duenez, dirutza horrekin segurtasun fakturari aurre egiteaz gain, «aparteko dirua eskuratu dugu besta egitaraua hobeto hornitzeko».

Ordaindutako sistema atxiki arren, hainbat neurri hartuko dituzte aurten hori malgutzeko. Hala nola, familiek ez dute ordaindu beharko barraken eremuan sartzeko. Orain arte adin txikikoei baizik ez zitzaien bermatzen erabateko doakotasuna.

Peñak eta hiriko karta

Hiria eta bere bestetako baloreak aletzen dituen karta aitzat hartu duten 70 bat peñek label berria eskuratuko dute aurten.

Besteak beste, hiriaren garbitasuna zaintzeko eta besta herrikoien alde jarduteko engaiamendua hartuko dute kartako izenpetzaileek.

Hala ere, berdintasunaren aldeko domeinuan ere peñako kideak, besta zale oro bezala, aktore aktiboak nahi ditu bilakatu Herriko Etxeak.

Elkarte feministekin elkarlanean eraso sexisten prebentzioa lantzeko Maina gunea zabalik izanen da, aurten ere, arratsaldeko ordutegian, Unibertsitate aitzineko eremuan, Baiona Ttipian.

Alkoholaren gain kontsumoaren aurrean prebentzio kanpaina berretsiko du aurten ere hiriak, era berean garraio publikoaren erabilpena sustatuz.

Parranda zaleendako hiru atseden-gune ezarriko dituzte aurten ere. 23.00etatik 4.00ak arte zabalik izanen diren eremu horietan edari bero bat eskaintzeaz gai, alkoholemia testak eta preserbatiboak urririk eskuratu daitezke.

Era berean, bestetako kanpinak 1.500 lagun hartzeko gaitasuna izanen du. Aurten prezio apalagoak eskainiko dituzte (besta forfait delakoa 72 euro ordez 50 eurotan proposatuko dute).

Bestalde, besta jasangarriagoa izateko xede bi milioi baso birziklagarri banatuko dituzte udal zerbitzuek ostatu eta elkarteen artean.

Azkenik, hiri garbitasuna hobetzeko neurriak iragarri ditu Herriko Etxeak: hartara, karrikan txiza egingo dutenek 68 euroko isuna ordaintzeko arriskatuko dute eta besten denboran komunak irekiak izateko araua beteko ez duten ostalariek ere santzioa jaso dezakete.

Egitaraua

Aurreko edizioetan bi egunez egiten zuten «braderie» edo kale merkatua lau egunez luzatuko dute aurten, besta zaleei arropak erosteko aukera zabalduz.

Tram'bus garraio publiko berria ezartzeko obrak direla-eta, Corso desfileak iaz estreinatu zuen ibilbideari eutsiko dio aurten ere. Era berean, barrakak lekualdatuko dituzte, De Gaulle plazatik Bouffles etorbidera eramango dituztela.

Berritasunekin jarraituz, euskal pilotaren masterrarekin batera, igandean ospatzen den Iruñeko hiriarekin senidetze eguna kari, Paul Bert plazan euskal kirola ardatz Lapurdi eta Nafarroako hiriburuen arteko erronka jokatuko da.

Horretaz gain euskal kultura eta besta uztartuz Karrikaldiak hitzordua emanen du arratsaldero eta gauero kontzertuak izanen dira. Aurtengo afitxan, besteak beste, Amparanoia, Puerto Candelaria eta Manau.