Kazeta

Kintoa xingarrak jatorrizko deitura babestua lortu du

Europar Batasuneko aldizkari ofizialak publikatu duenez, hemendik aitzina Kintoa xingarrak jatorrizko deitura babestua (AOP) izanen du. 2016an jatorrizko deitura kontrolatua (AOC) eskuratu ondotik, orain europar mailako aitortza eta babesa eman diote.

Kintoa xerria Euskal Herriko bertako arraza da. ©Isabelle Miquelestorena
Kintoa xerria Euskal Herriko bertako arraza da. ©Isabelle Miquelestorena

Bruselak onartu du Kintoa xingarrak beste 1.450 produkturekin batera Europa mailako elikagai babestuen artean izatea. Beraz, Ezpeletako biperrarekin eta Ossau-Iratiko gasnarekin batera AOP marka izanen du. Bitartean, Itsasuko gereziak ez du oraino izendapen hori eskuratu.

Uztailaren 2an erabakita, hemendik aitzina Kintoa xingarra etiketa europarrarekin agertuko da. Orain arte soilik Frantziar Estatu mailan onartua den jatorrizko deitura kontrolatua (AOC) zuen. Kintoa haragiari dagokionez, duela urtebete lortu zuen Europaren aitortza hori.

Sektoreko 75 ekoizleek eta bost transformatzaileek badute zer ospaturik. Aitortza hau urte ainitzetako lanaren emaitza da, baina baita “hastapen berri” bat ere, sektore horretako elkarteko presidentea den Michel Oçafrainek dion moduan. Bere hitzetan, lan handi bat bada egiteko: “AOP Kintoa eginen duguna izanen da”. Horrela, orain helburu berriak finkatu dituzte, gazte ekoizle berrien instalazioa edo euskal laborantzaren erakargarritasuna lantzea, erraterako.

Lipidotan aberatsa, Kintoa xingarra bere haragi gorriagatik da ezaguna. Lehengaia xingar freskoa da, luzeran moztua prest (xingar iberikoa), gutxienez hamar kiloko pisua duen pata osoarekin. Idorra, gatzatua, xingarrak ontze prozesu luze bat izan behar du, sei hilabetekoa gutxienez, horietako hamarretan baldintza naturaletan. Paketatua izan aitzin, xingarra Ezpeletako AOP biperraren hautsekin hunkitzen dute. Hezurrik gabe osorik edo laurdenetan, xerratan edo osorik hezur eta patarekin sal daiteke.