601 urteko kartzela mehatxua euskal presoen eskubideak defendatzeagatik

Irailaren 16an hasiko da Espainiako Auzitegi Nazionalean 47 euskal herritarren aurkako epaiketa, 11/13 sumarioaren baitan. 601 urte arteko kartzela zigorra eskatu du fiskalak. "Zer egin dugu?", galdetu dute larunbatean egindako agerraldi jendetsuan. Irailaren 14an Bilbon manifestazio handi baterako deia luzatu dute, Naiz atariak jaso duenez.

Kazeta|2019/06/04 07:10|0 iruzkin
_47akherrian
Larunbatean, irailaren 14rako mobilizazio handi baterako deia egin zuten auzipetuek. @47akHerrian

"Zer egin dugu kartzela eskaera luze hauek merezi izateko?", galdetu zuten Amaia Izkok eta Ane Zelaiak, heldu den irailaren 16tik aitzinera epaituko dituzten 47 euskal herritarretako bik, kideak ondoan zituztela, larunbatean Donostian egin zuten agerraldian. Izan ere, fiskalak 601 urte arteko espetxe zigorra eskatu du. Orain bost eta sei urte atxilotu zituzten; haietako batzuk presondegian sartu zituzten eta guziak auzipetu, Naiz atariak berri eman duenez.

"Presoen eta erbesteratuen osasuna artatu dugu; eskubideen aldeko mobilizazioak antolatu ditugu; senide bezala antolatu gara, bereziki sakabanaketa politikaren ondorioak gainditzeko; defentsa juridikoa egin dugu", zerrendatu dute.

"Gure printzipio politiko eta etikoei loturik aritu gara uneoro, eta lasai gaude egin dugunarekin", adierazi dute. "Asko izan du ederretik elkartasun sare honen parte izateak, pertsona bezala hobetu gaitu (...) Baina asko izan du minetik ere". Auzi luze honek beren bizitzak baldintzatu ditu, kartzelaren mamua dutelako parez pare, haiek eta haien hurbilekoek, besteak beste zaintzen dituzten 38 adin txikikoek.

Egindako aldarriei lotuak

Azaldu dutenez, epaiketa honen oinarrian dauden arrazoiek beren horretan diraute. Oroitu dute aro berri baten testuinguruan ari zirela lanean atxilotu zituztenean. "Urteetan luzatu zen gatazka konpontzeko bide berriak lantzen ari ginen, ilusioz, preso eta erbesteratuen gaia konpontzeko eginahalean. Horregatik kolpatu gintuzten".

Orain, egin dituzten aldarrikapenei lotu zatzaizkie epaiketa atarian. "Asko eta asko" izan dira haietako bakoitzak jaso dituen elkartasun keinuak, eta babesa agertu dieten herritar horiei, baita makro-epaiketa honekin asaldatu direnei ere, datorren irailaren 14rako antolatzen ari diren manifestaziora batzeko deia egin diete. Bilbon da hitzordua, epaiketa hasi baino bi egun aitzin.

Erran dutenez, eremu ezberdinetako pertsonekin manifestu zabal bat lantzen ari dira manifestazioari begira.

Babes ekonomikoa eman nahi dietenentzat kontu korronte bat zabaldu dute Laboral Kutxan (ES82 3035 0057 9205 7005 9033). Web ataria ere ideki dute, informazio guztia zabaltzeko.