Sorkuntza eta transmisioa, Euskal Elkargoaren proiektu kulturalaren ardatzak

Euskal Elkargoak maiatzaren 14an Luhuson aurkeztu zuen kultur arloan garatuko duen politika. Irakaskuntza, arte eta kultura hezkuntza, sorkuntza eta irakurketa publikoa izanen dira lerro nagusiak.

Kazeta|2019/05/17 14:45|0 iruzkin
Gar_projetculturelcapb_louhossoa_gfauveau-1
Bruno Carrère et Filgi Claverie, Euskal Elkargoaren proiektu kulturalaren presentazioan. © Guillaume FAUVEAU

Bruno Carrère kultur lankidetzaren, arte irakaskuntzaren eta kultur ondarearen kontseilariak eta Filgi Claverie zuzendariak Euskal Elkargoak kultur arloan garatuko duen politikaren ardatzak aurkeztu zituzten Luhuson. Maiatzaren 12an egindako presentazioan, xedea kultura ahalik eta manera zuzenenean eta errazenean eskuragarri jartzea dela erran zuten.

“Elkargoak gure lurraldeko talentuak lagunduko dituela espero dut”, erran zuen Carrèrek. Horretarako, gazteen artean artearen ezagutza sustatu, sortzaileak lagundu eta ekintza artistiko eta kulturalak garatu nahi ditu instituzioak. Claverieren arabera, “kultura erakargarritasun palanka bat da, baita alor ekonomikoan eta turismoan ere”.

Diru-laguntzen banaketa

Dirua esleitzeko garaian, Elkargoak proiektu kulturalari eskainitako 7 milioi eurotatik 4,5 milioi Maurice Ravel musika eskolara zuzenduko ditu. 1.700 ikaslek ikasten dute bertan, Baionan, Biarritzen, Donibane Lohizunen eta Hendaian banaturik. Herri arteko musika eskoletan ere irakasten da musika, hala nola, Amikuzen, Errobin, Hazparneko lurraldean eta Hendaian berean.

Diru-laguntzek bi maila dituzte. Euskal kultur institutua eta Euskal Museoa bezalako egituren aktibitateak Ipar Euskal Herri mailakoak direnez eta proiektu kulturalaren lau ardatzak barne hartzen dituztenez, 1,8 milioi jasoko dituzte. Bestalde, herri elkargoak zirenak aurrekontu bat izanen dute, biztanle gutien dituzten lurraldeei laguntza azkarrago bat emanen zaielarik.

Ttipitatik artera hurbildu

Proiektu honen beste atal batean, arte irakaskuntza eta bitartekaritza Kultura Bidean proiektuaren bidez garatzen da. Bere helburua adin ttipitik arte munduaren ezagutza sustatzea da. Eskola eremuan 1.400 oreneko aktibitateak egin ahal izan dira. Lurralde guzian 250 emanaldi eta 27 ikusgarri izan dira aurkeztuak, kulturari loturik ez diren leku ainitz kultur gune bilakatuz. 

Bitartekaritza Hameka fabrikarekin egiten da, xedea izanki sormen lanarekin lurraldearekiko lotura sendotzea. “Gipuzkoako Dantzaz konpainiak Xiberoko ikasleekin lan egin zuen Gurs-en”, jakinarazi zuen Bruno Carrèrek. Elkarrekin “Basoak” ikusgarria antolatu zuten, zeinak historian zehar errefuxiatuen gaia lantzen duen.

Haatik, zinemak, ikus-entzunezkoek eta ekoizpenak Elkargoaren kultur proiektuan ez dute lekurik izanen. “Lehendik ginen sektoreetan inbestitzeko erabakia hartu genuen, lurralde osoan hedatuz”, argudiatu nahi izan zuen Carrèrek.

Hameka arte fabrika

Frantziako Kultura Ministerioak azken urteetan gisa horretan izendatua du Luhuson kokaturik den sorkuntza artistikorako gunea. Espazio honek artistei frantsesezko eta euskarazko antzerkia, zirkua eta dantza sorkuntzak laguntzen ditu. Erraterako, 2018-2019 sasoi honetan frantziar Estatuko eta Hego Euskal Herriko 26 konpainia hartu ditu.

Memento honetan Okzitaniako Tolosako Les Chiennes Nationales bi astez da Hamekan. “Eguneroko bizitik ateratzeko memento zoragarria da”, dio Maiak. Konpainia “Bizitzak enetzat zer erran nahi du” lanarekin ari da. Jack London egileak sozialista nola bilakatu zen kontatzen du testuan. “Erresistitzeak zer erran nahi du? Zer da militante izatea?” galdetzen dute Maiak eta Clemencek. Aste honetan Euskal Herriko pertsonalitate politikoekin elkarrizketak izanen dituzte. “Pozten gaitu Hamekak bilkura hauek egiteko aukera ematea”.