Dolua pilota munduan: Patrick Oçafrain pilotaria zendu da

Aldude ibarreko pilotari ezaguna eritasun luze baten ondorioz 44 urterekin zendu da igande honetan.

Kazeta|2019/05/13 10:53|0 iruzkin
Med_championnat_amateur_ocafrain_lekorne_imiquelestorena25
Patrick Oçafrain, Baionako Moderne trinketean jokaturiko partida batean. © Isabelle MIQUELESTORENA

1998an Mexikon buruz-buruko munduko txapeldun izana, sortzez Bankakoa zen Patrick Oçafrain pilotaria igande honetan hil da eritasun luze baten ondorioz. Hileta maiatzaren 15eko arratsaldean izanen da, 15.30ean, bere Baigorriko elizan.

Baigorriko klubean hasi eta Elite Pro mailaraino egindako ibilbidean, belaunaldi berriek jarraitu beharreko eredutzat hartua izan da Oçafrain. Pilotari osoa kantxan, bere aurkariekiko errespetua ukan zuen beti. Bankarra bere belaunaldiko pilotarien artean 2012ko Frantziako txapelketan onenetakoa izan zen buruz-buru. 2013an, haatik, erretiroa hartu zuen, Herriarena trofeoko finala jokatu ondotik.   

Pilotaren munduan aski maitatua, Patrick Oçafrainek publikoarengandik omenaldi beroa jaso zuen. Gerora Baigorriko ehorzketa etxeko kudeaketa lanetan aritu zen, baina beti pilotari loturik. Amateur zirkuituan bitan izan zen txapeldun eta haurrak, gazteak eta helduak ere entrenatzen zituen.

Zaharrer Segi elkarteko presidente den Gratien Juantorenak hunkiturik oroitzen du zendu berri den pilotaria. “Gizon miresgarria zen, berarekin jokatzen zuten edo entrenatzen zituen jendeak laguntzeko prest zen beti. Hor zen haurrentzat edo elkartearentzat zernahi antolatzeko: entrenatzaile eta arduratsu izatearen oreka erakutsi zuen. Maila izugarriko gizona izan zen”.