Kultur arteko elkartasun topaleku izanen da Divercity besta

Maiatzaren 10 eta 11n Hendaian ospatuko da Divercity besta solidario eta parte hartzailea. Mota guzietako kultur ekitaldiak eginen dira bi egunetan zehar.

Kazeta|2019/05/07 07:21|0 iruzkin
Irlandarrak
Sheep´n´beer taldearen punk rock zeltiarra ikusteko parada izanen da Hendaian.

Divercity bestaren edizio berri bat eginen da maiatzaren 10ean eta 11n Hendaian. Hiriko gazteriaren informazio bulegoak antolatzen duen kultur arteko ekitaldi honek izaera solidario eta parte hartzailea du.

Maiatzaren 10ean Les Variétés zineman iraganen dira programatuak diren ekimenak. 16:30ean idekiko dira antzokiko ateak, Divercity gertaerari hastapena emanen dion presentazioari bide emateko. Arratsaldean zehar, hiru film proiektatuko dira: Pasapalabra- Short film eta Kalangala Dreams: A Documentary film laburrak urririk eta Sami Blood film luzea 4 eurotan. Ondotik, norberak eramandako janekin aperitifa eginen da, gonbidatuekin elkarrizketa izateko aukerarekin.

Maiatzaren 11n berriz, 13:00etan idekiko dira Beltzenia aitzinean muntaturiko karparen ateak. Herri ezberdinetako boluntarioek standak ezarriko dituzte; Europan eta mundu mailan mugitzeko aukerez informatuko da Pistes Solidaires elkartearen eskutik; Etorkinekin BAB elkartea migranteen harrerari buruz arituko da... Horiekin batera, horma irudiak eta bizikleta nahiz fanzine tailerrak izanen dira.

Arratsaldean, Brasileko ekialdeko eta tzigana dantza iniziaziorako aukera eskainiko da. 10 eurotan prestaturiko afarian indarrak hartu ondotik, 21:00etatik aitzina kontzertuen tenorea izanen da. Tristtan Mourguy eta Horeba (Donibane Lohizune), Rosana Band (Damasko, Siria) eta Sheep´n´beer (Dublin/Baiona) taldeek girotuko dute gaualdia.