Kazeta

Bazkidetza kanpaina berri bat abiatuko du Lurzaindiak

Lurzaindiak elkartasunezko aurrezkiari dei egiten dio bi proiektu berri sostengatzeko Donaixtin eta Ahurtin. Maiatzaren 5ean Donaixtin iraganen den Lurraren Egunean hasiera emanen dio harpidetza kanpaina berriari.

Bastien Cecchetto eta Perrine Decarsin Donaixtin instalatu den bikote gaztea. © Guillaume Fauveau
Bastien Cecchetto eta Perrine Decarsin Donaixtin instalatu den bikote gaztea. © Guillaume Fauveau

Ama lurra babesteko nahiari eusten dio Lurzaindiak. Bere ibilbidea hasi zuenez geroztik, helburu berdinarekin lanean segitzen du eta abiatu duen bazkidetza kanpaina berria bide beretik doa. Hots, Euskal Herrian laborantza lurrak mantendu elikadura burujabetza, enpleguen sortzea, tokiko elikaduraren sustapena eta laborantzaren transmisioa ahalbidetzeko.

Lurzaindiak abiaturiko sostengu kanpainak 2018an eskuratutako 38 hektarea lur ordaintzeko xedea du. Diru bilketa hori 135.000 euroko mailegua ordaintzeko baliagarria izanen da. Mailegu horri esker, hiru laborari Ipar Euskal Herrian instalatu ahal izan dira. Bastien Cecchetto eta Perrine Decarsin Donaixtin abiatu dute beren abentura eta Laura Danielek berriz, Ahurtin. Lurzaindiak lehentasunez erosteko eskubidea eskatu zion Saferrari mediku batek lurrak erosi nahi zituelako.

"Lurren espekulazioaren kontrako borrokan, anitzetan bakarrik sentitzen gara", deitoratu du Dominique Amestoy Lurzaindiako lehendakariak. Alta, Euskal Herriko Laborantza Ganbararen azken biltzar nagusian, hautetsi andana bat laborantza herrikoia defendatzearen alde agertu zen. Euskal Elkargoko lehendakaria den Jean-René Etchegarayk ere bat egin zuen jarrera horrekin. Lurzaindiaren aburuz, hitzak baizik ez dira. Presidenteak dioenez, badira bi urte bilkura bat eskatzen diola Euskal Elkargoari. Gutun berri bat bidali diote.

Zalantzarik gabe, laborantza lurren egoera kezkagarria da, estatistikek islatzen duten bezala. Hain zuzen, 2000 eta 2010 urteen artean, Ipar Euskal Herriak laborantza lurren %25 galdu du, horietatik %9 laborantzarako erabiliak izan behar zirenean. Horien prezioa %28 igo da. 2013tik lanean dabilen Lurzaindiak ezin izan du zauri hori sendatu.

Gizarteak ere lan honetan bere ekarpena egin dezake. Bazkidetza kanpaina berria maiatzaren 5ean Donaixtin iraganen den Lurraren Egunean abiatuko du elkarteak. Baserriko merkatutik landa, dantza emanaldi bat eta bazkari bat proposatuko ditu.

Horrez gain, laborantza herrikoaren aldekoek Lurzaindiako akzioak erosten ahal dituzte. Bost urteko inbertsioa eskatzen bederen Lurzaindiaren kapitalaren funtzioa epe luzerako lurren erostea baita. Webgunean edo gutunez egin daitekeen inskripzioak hogei euroko balioa du.