Xarnegu Eguna ekitaldiz betea heldu da

“Nahasketa” festibala heldu den apirilaren 30etik maiatzaren 5era iraganean da Bidaxuneko lurraldean. Kultur-ekitaldi honen xedea da landa-ingurunean kulturen eta hizkuntzen nahasketa sustatzea eta belaunaldi berrien arteko loturak azkartzea.

Kazeta|2019/04/25 07:40|0 iruzkin
La-yegros-678x381
Maiatzaren 4an La Yegros, Goulamas´k eta Omiors taldeen kontzertua izanen da.

“Kultura oro nahasketatik, ezagutzetik eta kaskakoetatik sortzen da. Aitzitik, isolamenduarengatik hiltzen dira zibilizazioak”. Octavio Paz poeta mexikarraren erranaldi honekin aurkeztua da 2019ko Xarnegu Eguna. 2005etik ospatzen den kultur-ekitaldia apirilaren 30etik maiatzaren 5era eginen da Bidaxunen, Euskal Herriak Landekin eta Biarnorekin muga egiten duen lurraldean.

Antolatzaileek egitarau zabala osatu dute. Kontzertuak, antzerkia, zinema, afaria edota ondarearen ezagutza bezalako ekitaldiak iraganen dira herri ezberdinetan. Aipagarria da Mikel Laboaren kantuetan oinarrituz maiatzaren 1ean Bardozen Philippe Alborrek, Maialen Alfarok eta Bardozeko eskolako sail elebiduneko ikasleek eskainiko duten kontzertua.

Ekitaldietarako sartzeak festibalaren web atarian, Bardozeko Herriko Etxean eta Baionako Elkar dendan erosten ahal dira.