Eguzki-energiaren bidea hartu nahi du Biarritzek

Panel fotovoltaikoak hamalau gune publikotan ezarriko dira. Biarritzeko Hiriak deialdi bat egin du operadorea hautatu ahal izateko.

Kazeta|2019/03/30 14:00|0 iruzkin
Amikuzen
Geroz eta gehiago dira Ipar Euskal Herrian eguzki-energiaren alde egiten duten herriak. @Udalbiltza

Eguzki-energiaren hiria bilakatzea da Biarritzeko Herriko Etxearen anbizioa. Gisa horretan, energia fotovoltaikoa garatu nahi du hiriko aparkalekuetan, eskoletan eta gimnasioetan. Martxoaren 26an egindako herri kontseiluak lehen urratsa egin zuen, proiektua landuko duen konpainia aurkitzeko deialdia abian jarriz. Hitzarmena berantenez heldu den azaroan izenpetu beharko litzateke.

Guillaume Barucq ingurumenaren axuanta denak, proiektua harro aurkeztu zuen. “Lurraldean ez da gisakorik abian jarri”, erran zuen. Urrats ttipien politika bukatzeko beharra agerikoa da, are gehiago Euskal Herrian zein munduan aldaketa klimatikoaren inguruko alarma emendatzen ari den garaiotan. Ekologikoa eta berriztagarria izateaz harago, eguzki-energiak abantaila ekonomiko nabarmena du. Bere iritziz, inbestituriko espazioek urrea balioko lukete.

Enpresa operadorea maiatza aitzin hautatu beharko da eta bera izanen da ekipamenduaren instalazioen lanez arduratu eta esplotazioa bermatuko duena. Hiriarekin jabetza publikoa okupatzeagatik 20 urteko hitzarmen bat izenpetu beharko du. Ekoizturiko elektrizitatea saldu eginen du eta Biarritzeko Hiriak zerbitzu zerga bat kobratuko dio. Hiriko zentro teknikoan ez bezala, kontua ez da izanen autokontsumorako energia sortzea.

Iratiko aparkalekua, Reptou eskola, gazte aterpea, Rotary gimnasioa... Leku publikoetan kilowatt potentzia neurtzeko audita bat egin zen eta ondotik, hamalau leku hautatu. Lau aparkalekuetako potentzia handiena 3.240 MWekoa litzateke. Eraikinetan berriz, 1.340 MWekoa. Eguzkiaren energia hartzeaz gain, instalazioek aparkalekuetan itzala eginen dute.