Bideo homofobo batek BO-Aviron derbiaren ataria gaiztotu du

Jean-Baptiste Aldigé Biarritz Olympiquen presidenteak salaketa jarri du Aviron Bayonnaisen zaletu batzuk bere kontrako bideo homofobo bat argitara eman dutelako sare sozialetan.

Kazeta|2019/03/29 08:05|0 iruzkin
Derbi
Kirol lehia sanoaren ordez, derbiaren atarian tentsioa nagusitzen ari da. (Isabelle MIQUELESTORENA)

Heldu den apirilaren 4an jokatuko da Biarritz Olympique eta Aviron Bayonnais euskal errugbi kluben arteko derbia. Alta, kirol lehia nagusi izan behar lukeen partidaren bezperatan, tentsioa emendatu duen arrazoi nagusia ez da hori izan, sare sozialetan BOPBren presidentearen kontra hedatu den bideo homofobo bat baizik.

Bideo hori Aviron Bayonnais taldeko zale batzuk Twitterren publikatu zuten joan den martxoaren 15ean. Gizon batzuk ageri dira kantuz, biarriztarrak eta BO-ko arduraduna "maritxuak" direla kantatuz. Sei egun berantago, Aldigék salaketa ezarri zuen “sexu orientazio edo identitatearen kontrako irainengatik”. Bi aldeek sare sozialetan mezuak igortzen segitzen dute ordutik.

Biarritzeko taldeak igorritako oharrean zioen, “Aviron Bayonnaisen Boc (Bayonnais d´Origine Certifié) elkartearen ustezko kideen ekintzak deitoratu, salatu eta arbuiatzen” dituela. Era berean, Baionako klubeko arduradunen jarrera kritikatu zuen, egoera horren aitzinean ez jakinarena egin eta gisako ekintzak onartzen dituelako.

Philippe Tayeb Avironen batzordeko presidenteak Aldigén adierazpenak deitoratu zituen: “ez gara ados Avironeko arduradunek bideo homofobo bat babesten dugula dioten adierazpenekin”. Bere ustez, gertaera hauek erabiltzeko nahia izan daiteke eta Avironek homofobiaren gaia errespetuz eta seriotasunez hartzen duela baieztatu zuen, polemika bilatzen duten jokabideetatik kanpo.

Afera honetan, Boc zaletuen taldeak ere bere burua defendatu nahi izan zuen: “nahiz eta zure kontra egiten diren komentarioak salagarriak izan, ez dira gure elkartearen ardura. Eskertuko genuke komentario hauen eta gure elkartearen artean oinarririk gabeko loturarik ez egitea”. Elkarte honetako kideek Aldigékin harremana egiteko asmoa agertu dute, haren bertsioa entzun ahal izateko, “bere kontrako erabaki bat hartu aitzin”.

Frantziako Errugbi Liga Nazionalak, zeinek kexa pausatu berri duen, eta Errugbi Federazioko presidenteordeak BOPBko presidenteari babesa adierazi zioten, kirol prentsan beste gairik ez zen bitartean.