Saien “otordua” ikusteko aukera Duzunaritzen

Euskal Herriko CPIEk (Ingurumen Ekimenen Zentro Iraunkorra) eta Departamenduko Kontseiluak heldu den apirilaren 6an Duzunaritzen saientzat egokituriko eremu bat bisitatzeko ibilbide gidatua proposatzen dute.

Kazeta|2019/03/28 08:45|0 iruzkin
Cencerros4_vigor_
Saientzat egokituriko eremu bat bisitatzeko aukera eskainiko dute. (Iñaki VIGOR)

Antzina, sarraskijaleei jaten ematea zen etxaldeko animala hilen gorpuzkiak desagerrarazteko praktika. Gisa horretan beste animalia batzuk elikatzen dira eta eritasunak zabaltzea saihestu. Hori da CPIEk Departamendu Kontseiluarekin batera apirilaren 6an Duzunaritzeko Gamia gainean antolaturiko ibilbide gidatuak ezagutarazi nahi duena. Zehazki, bertaratu nahi dutenek tokiko hazleek saientzat egokituriko eremu bat ikusi ahalko dute.  

Naturalistek eta animalia salbaien zaintzaileek beren ezagutzak azalduko dituzte eta azalpenak entzuteaz gain, tailerrak ere proposatuko dira. CPIEk igorritako oharrean gogora ekarri nahi izan du saiak artzaintzaren meneko direla eta pozoituak ez ezik, usu lerro elektrikoen kontra jotzeko arriskua izaten dutela.

Urririk izanen diren bisita hauek goizeko 11:00k eta 17:00ak artean eginen dira. Mendian ibiltzeko oinetakoak, ura eta haize nahiz hotzerako jantziak eramatea galdegiten da. Parte hartu ahal izateko 0559374720 telefono zenbakira deitu edo cpie.pays.basque@wanadoo.fr helbidera idatz daiteke.