Kazeta

Pilotari profesionalek partida gehiegi jokatzen ote dituzte?

Elite Pro mailan jokatzen duten pilotari profesionalek txapelketen egutegia bete-betea dute, urtean pausarik gabe. Denboraldi oso batean zehar, maila goreneko kirolari hauek haien gorputzak proban jartzen dituzte.

Errekuperazio tarte luzeagoak hartzea aterabidea izan daiteke federazioko sendagilearen ustetan. © Aurore Lucas
Errekuperazio tarte luzeagoak hartzea aterabidea izan daiteke federazioko sendagilearen ustetan. © Aurore Lucas

Mathieu Ospital bizkarreko lesioak bata bestearen gibeletik izaten ari da. Bixintxo Bilbaok sorbaldako lesioa du eta Peio Larraldek berriz, oinekoa. 2019ko lehen txapelketan, hots, Frantziako Elite Pro izenekoan, ikuskizuna aurreikusitakoa baino apalagoa dela pentsatzekoa da. “Pilotarien artean hiru lesio hauek ohikoak izaten dira. Sorbalda eta bizkarreko mugimenduetatik jotzen diren kolpeen ondorioa dira”, azaldu du Jacques Jeannou Frantziako Federazioko mediku eta erreumatologoak. Eskuko ohiko patologia baskular edota traumatikoen ondorioz, normala omen da pilotariaren gorputz osoa minbera izatea.

Usaian, denboraldia urtarrilean Frantziako txapelketekin hasi ohi da. Hiru pilotari eriturekin eta bi opor egiterekin, urte hastapeneko balantzea ez dirudi onena denik. Gainera, egutegiak ez du errekuperatzeko betarik eskaintzen. Urtarriletik apirilera izanen den Frantziar Federazioaren txapelketaren ondotik, Esku Pilota zirkuituko torneoak abantzu astebururo jokatzen dira, maiatzetik azarora arte. Abenduan berriz, Super Prestige delakoa jokatzen da. Hori guti ez eta 2018ko urrian Bartzelonan ospatu ziren Munduko Txapelketak gehitu behar zaizkio egutegi pisutsu honi.

Frantziar txapelketako A multzoko lau pilotariek 2018an jokaturiko partidei dagokienez, Ducassouk 40 jokatu zituen, Ospitalek 39, Bilbaok 37 eta Larraldek 36. Aste bakoitzeko partida bat erran nahi du horrek, entrenamendu eta partida bereziak kontuan hartu gabe. Peio Larralde, haatik, mota guzietako egutegietara egokitzen da. “Ez dugu sobera jokatzen. Fisikoki prestatuak gaude eta mediku segimenduak bermatzen digu baldintza onenetan jokatu ahal izatea”, dio.

Aterabideak bilatuz

Edozein gisaz, bi pilotarien arabera, errekuperatzeko “errotazio” bat egitea onuragarria izan liteke, baita kirolarentzat ere. “Antolatzaileek onartzen badute noizbehinka Esku Pilotak erratea pilotari bat edo bestea forman jartzeko pausa egitea eta partida garrantzitsuetarako prestatzea, ona litzateke”, aitortu du 2019ko Frantziako txapeldunak. “Beharbada torneo handietara begiratu beharko genuke eta beste batzuetan, gazteak sartu aitzinatu daitezen”, jarraitu du Peio Larraldek.

Lesioak saihesteko “errekuperazio tarte luzeagoak hartzea aterabidea izan daiteke”, dio Jeannou medikuak Battitt Ducassourekin bat eginez. Baina ez du uste hau soluzio bakarra denik. “Luzaketak eta muskuluen masajeak funtsezkoak dira”, gaineratu du erreumatologoak.

Denboraldiko egutegia betea izanda ere, pilotariak badaki bere gorputza bereziki zaindu beharra duela. “Zahartzen garen heinean, gure gorputza higatzen da, eta ongi ezagutu behar dugu, lesioa kirolariaren biziaren zati bat gehiago baita. Gisa berean, antolatzaileek pilotari onenak ukan nahi izatea ere ulertu behar da. Debate luzea da hau”, erran du Battitt Ducassouk egutegiari erreferentzia eginez. Etenik ez duten lesio hauek debate hori elikatu behar lukete.