Kronika
 
Aurrera Altsasu!

IRITZIA- Madrilgo Auzitegi Nazionaleko dei aretoak Altsasuko gazteen kontrako zigorra berretsi ondotik, gertakariei buruz idatzi du Egoitz Urrutikoetxeak. "Prozedura inpartziala" izateaz gain, Altsasuko herritarrek presio mediatikoa, politikoa eta poliziala pairatu behar izan dutela deitoratu du.

Egoitz URRUTIKOETXEA|2019/03/11 06:45|0 iruzkin
Egoitz_urrutikoetxea
Egoitz Urrutikoetxea iruditan.

2016ko urrian Altsasun abiatu zen amesgaiztoak ez du etenik. Martxoaren 7an jakin dugu azken berria. Madrilgo Auzitegi Nazionaleko dei aretoak, Altsasuko gazte auzipetuei ezarri zigor larriak berretsi ditu:

Oihan Arnanz 13 urte.
Jokin Unamuno 12 urte.
Adur Ramirez de Alda 12 urte.
Jon Ander Cob 9 urte.
Aratz Urruzola 9 urte
Julen Goikoetxea 9 urte.
Iñaki Abad  6 urte.
Ainara Urkijo 2 urte.

Altasasuko Koska ostatuaren aitzinean abiatu zen kalapita Estatu auzia bilakatu zuteneko kronika hitsa dugu honako hau. Edo, nola alkoholez bustiriko gau batean gertatu borroka soil bat Guardia Zibilaren kontrako gorroto ekintza bilakatu duten.

Espainiako eskuin muturraren komunikabideek zuten lehenik sua piztu. Ordu gutira, Guardia Zibilak epaileen manu berezirik gabe, Altsasu herria setio egoeran ezarri eta ustez kalapitarekin zer ikustekorik zuten gazteak atxilotu zituen. Auzibidea Iruñeako auzitegiaren esku utzi beharrean, Madrilgo Auzitegi Nazionalak eskuartzea deliberatu zuen, gertakariek terrorismoarekin zer ikustekorik zutelakoan.

Ezin erran prozedura inpartziala izan denik. Orkatila bihurritua izan zuen Guardia Zibilaren kideek dute Altsasuko gertakarietaz inkesta egin. Guardia zibilek dituzte atxiloketak burutu. Eta Altsasuko gazteak epaitu eta zigortu dituen epaimahaiaren buru izan den Espejel epailearen senarra Guardia Zibilaren kolonela da.

Geroztik, etengabekoa izan da Altsasuko herritarrek pairatu behar izan duten presio mediatikoa, politikoa eta poliziala. Pentsa daiteke, Altsasuko gertakariak instrumentalizatuz hastapen batean Nafarroako giro politikoa nahasi nahi izan zutela. Alferrik ordea. Izan ere, Altasasuko herriaren eta Nafarroako herritarren arrapostua zinez eredugarria izan da. 2018ko ekainaren 16an 80.000 pertsona bildu ziren Iruñeako karriketan Altsasuko gazteen alde, Nafarroan inoiz antolaturiko manifestaldi handienean.

Nafarroako eta Euskal Herriko herritarren gehiengoaren begietara injustizia larria da Altsasuko auzia. Alabaina, Altsasuko eta Sakanako gazteen artean ezintasuna eta izua dira nagusi. Ezintasuna, guzia zentzugabea izanik ere Altsasuko gazteek preso jarraitzen dutelako. Eta izua, boterearen gehiegikeriak mugarik ez duela ohargarri baita.

Altsasuko gazteen burasoak eta lagunak txarrenari onena ateratzeko gai izan dira. Bide beretik segi dezagun, elkartasuna hedatuz eta Altsasukoen injustizia lau haizetara salatuz.