Abbadia gazteluaren bisita, bertsoz lagunduta

Hendaiako euskararen hilabetearen karietara, heldu den martxorako Abbadia gaztelua ezagutzeko bisita antolatu dute. Odei Barroso bertsolari urruñarrak bertso bidez osatuko ditu ibilbidearen xehetasunak.

Kazeta|2019/02/12 06:35|0 iruzkin
Ch_teau_abbadia
Abbadia gazteluaren bisitak bi oren t´erdi iraunen du.

Heldu den martxoaren 30ean bisita berezia eginen da Hendaiako Erlaitza bidean kokaturiko Abbadia gaztelura. Arratsaldeko 17:00etatik aitzina, bi oren t´erdiko ibilbidean, gidariak gazteluari buruzko azalpenak eginen ditu eta Odei Barroso bertsolariak haren iruzkinei bertsoak jarriko dizkie.   

Anton Abadia (1810-1897) zientzialaria eta esploratzailea izateaz gain, euskal kulturaren eta euskararen defendatzaile kartsua izan zen. Lore jokoak ere prestatzen hasi zen eta haietan bertso saioak antolatzeari ekin zion. Jarduera horren baitan kokatu dute martxoan zehar Hendaian eginen den euskararen hilabetearen barneko bisita gidatu berezi hau.  

Bisitaren sartzeak 10 € balioko du eta 5 € sei eta hamabi urte artekoentzat. Guziei idekia bada ere, leku mugatuak izanen direla iragarri dute. Hori dela eta, erreserbak Hendaiako turismo bulegoan edo 0559200451 / 055920034 zenbakietara deituz egin daitezke.