ELB garaile Ipar Euskal Herri mailan

FDSEA sindikatuak bozen gehiagoa eskuratu du departamendu mailan Laborantzako Ganberarako. Ipar Euskal Herriari dagokionez, ELB sindikatu bozkatuena izan da.

Maite UBIRIA|2019/02/07 06:30|0 iruzkin
Med_elb_zerrenda_ehlg_ainhiza_imiquelestorena01
ELB sindikatuaren zerrendak 1.267 boto jaso ditu. © Isabelle MIQUELESTORENA

Euskal Herriko Laborarien Batasuna (ELB) izan da sindikatu bozkatuena Lapurdin, Baxe Nafarroan eta Xiberoan Paueko Laborantza Ganberarako bozetan. Urtarrilean zehar egin zen hauteskunde prozesuaren emaitzak atzo plazaratu zituen Prefeturak. Departamendu mailan FDSEA lehen indarra izanen da beti, Garako artikuluak azaldu duenez.

Paueko Laborantza Ganbera berritzeko bozak FDSEA sindikatuak irabazi zituen, 2.825 boto eskuratuta (%53,98). Izan ere Lapurdiko, Baxe Nafarroako eta Xiberoko laborariek emandako botoak aintzat hartuta, ELBk %50ko langa gainditu duela baieztatu zuen Panpi Sainte-Mariek. Beraz, euskal lurraldeetan lehenengo indarra izaten jarraituko du.

Orotara, ELB sindikatuaren zerrendak 1.267 boto jaso zituen (%24,21), bigarren indar gisa agertuz Pirinio Atlantikoetako departamendu mailan.

Paueko Laborantza Ganberarako azkeneko hauteskundeak 2013an iragan ziren. Departamendu mailan, orduan ere, FDSEA izan zen sindikatu bozkatuena, botoen %49,59 eskuratu zituelarik. Hauteskunde horietan ELB sindikatuak Confederation Paysannekin zerrenda komuna osatu zuen. Hartara, laborantza jasangarriaren aldeko engaiamendua hartu zuen hautagaitza horrek botoen %35,31 eskuratu zituen departamendu mailan.

Ipar Euskal Herriko laborarien bozak bi hauteskunde barruti ezberdinetan jasotzen dira. 2013an ELB nagusitu zen Baionako hautes-barrutian (Lapurdiko eta Baxe Nafarroako laborariak), botoen %48,43 eskuratuz. Oloroe-Donamaria hautes-barrutian (Xiberoko gehi Biarnoko laborariak) FDSEAk botoen %52,23 lortu zituen eta ELBk %39,26.

Atzoko emaitzen arabera, Confederation Paysannek botoen %13,19 jaso zituen. Beraz, aliatu gisa jardun ohi diren bi sindikatuen artean botoen %37,4 metatu zituzten, 2013an baino bi pundu gehiago.

Aurtengo bozek beste datu deigarria utzi dute: abstentzioa. 2013an parte-hartzea %62,63 izan zen. Aurten, ordea, %54,23. Boz hauetan laborariek lehen aldiz boto elektronikoa ahal izan dute erabili. Hala ere, parte-hartzea 8,4 puntutan apaldu da.

Euskal Elkargoaren eskutik

Iparraldean orotara 4.500 etxalde daude, hau da, baserri bat dago 64 biztanleko. Frantziar Estatuan, haatik, 128 biztanleko etxalde bat dago. Hala ere, azkeneko hamarkadan Iparraldeko etxaldeen %25 desagertu egin dira.

Hartara, laborantza eta lurraldeko elikadura aintzat hartuko lituzkeen onura publikoko egitura baten sorrera aldarrikatu du ELBk. Euskal Elkargoak laborantzaren aldeko politika publikoa garatzeko engaiamendua berretsi zuen iazko abenduan.