Euskararen hilabetea Baionako Zizpa gaztetxean

Baionako gaztetxeak otsail osoan zehar euskararen aldeko ekimenak antolatu ditu, gazteen artean euskararen erabilera sustatzea helburu gisa harturik.

Kazeta|2019/02/06 13:55|0 iruzkin
Capture_d_e_cran_2017-10-18_a_10
Otsailaren 12an Eneko Bidegainek hitzaldi bat eskainiko du Baionako gaztetxean. ©Isabelle Miquelestorena

Kultur proposamen oso bat osatuz, Baionako Zizpa gaztetxeak euskararen hilabetea prestatu du otsailerako. Euskaraldiaren proiektuaren bidetik, gazteek ere hizkuntz ohituretan eragin nahi dute eta antolatu dituzten ekimenetan “euskara praktikatzeko aukera berriak” sortu nahi dituzte. Ildo horretan, Ahobizi eta Belarriprest diren pertsonentzat dinamikak ez ezik, gaztetxean pinak eskuragarri izanen dira.

Lehen hitzordua otsailaren 7an emana da. Arratsaldeko 19:00etan Pirenes ostatutik abiaturik, ihauteri poteoa eginen dute hiriko ostatu ezberdinak igaroz eta txaranga batek animaturik. “Z” hizkiz hasten diren mozorroak janztea proposatu dute.

Otsailaren 12an berriz, Eneko Bidegainek hitzaldia eskainiko du gaztetxean. Zatituriko herri batean euskararen egoeraz eta bereziki Lapurdi, Baxe Nafarroa eta Xiberoan horrek dituen ondorioez azalpenak emanen ditu.

Otsailaren 20an berriz, bi filmen proiekzioa iragarri dute, gaztetxean berean. Haurrentzat zuzenduriko “Chihiroren badina” 14:00etan hasiko da eta arratsaldeko 19:30etan berriz, “Errementari” filma eskainiko dute.

Egun bat berantago Rap saioa izanen da Kalostrape ostatuan, 19:00etatik goiti. Otsailaren 23an berriz, mus txapelketa eta sagardotegi afaria. Lekua erreserbatzeko web atarira jo daiteke. Otsailaren 26an eginen den sukaldaritza tailerrak eta martxoaren 2ko “Zizpa Kantuz II” kantaldiak, bukaera emanen diote euskara biziarazi nahi duen gazte ekimen berriari.