Euskarazko ikerketak hitzordu bat du Baionan

Udako Euskal Unibertsitateak, Iker Zentroarekin elkarlanean, “IkerGazte: Nazioarteko ikerketa euskaraz” kongresua antolatu du maiatzaren 27, 28 eta 29rako Baionan. Euskarazko lanak erakutsi eta ikerlarien arteko harremanak sustatu nahi dituen ekimenean parte hartu nahi dutenek beren artikuluak bidali behar dituzte otsailaren 22a baino lehen.

Iurre BIDEGAIN|2019/01/18 14:00|0 iruzkin
Guz_iker_bobedme103
"IkerGazte: Nazioarteko ikerketa euskaraz" kongresua aurkeztu dute Baionan urtarrilaren 17an. ©Bob EDME

Ikerlari euskaldunek beren agenda har dezatela. Baionan maiatzaren 27, 28 eta 29an "IkerGazte: Nazioarteko ikerketa euskaraz" kongresuan parte hartzeko deia luzatu baitie Udako Euskal Unibertsitateak (UEU). Iker Zentroarekin elkarlanean, alor guzietan euskaraz egiten diren ikerketa lanak erakusteaz gain, ikerlari gazteei ere topagune bat eskaini nahi die.

Ekimenaren bidez ikerlari gazteei sareak eraikitzeko parada proposatu nahi zaie, baita elkarrekin lankidetza sustatzeko aukera eman ere. Hauek dira kongresuaren helburu nagusiak, Urtzi Etxeberria Iker Zentroko zuzendariak nabarmendu duenez. Bere erranetan, hitzordua Baionan antolatzea "pozgarria eta onuragarria" da. Kepa Sarasola UEUko zuzendaria harekin bat dator. Baionak irudikatzen duen "toki magikotik" indarra hartzeko garrantzia azpimarratu du, hain zuzen.

Azken honek UEUk duen helburua gogora ekarri du: euskal komunitate-zientzifiko-intelektuala trinkotzea. Komunitate horretan, "inoiz baino gehiago garela" goraipatu du. "Duela 40 urte euskaraz egiten ziren ikerketa lanak 0 ziren. Iruñean 2017an egin genuen kongresuan 100 artikulu baino gehiago jaso genituen eta euskarazko ikerketaren inguruan diharduten 200 pertsona elkartu ziren", azaldu du.

Nafarroako hiriburuan izan zirenen artean, Pauline Guelle ikergaztea presente zegoen. Zuzenbide alorrean murgilduta dagoen baionarrak kongresuak euskarazko lana zabaltzeko eta harreman berriak eraikitzeko irudikatzen duen aukera nabarmendu du. "Ainitzetan tesiarekin bakartuta gaude eta honek norberaren lanentzat ateak irekitzea zein beste alorretan egiten diren lanak deskubritzea ahalbidetzen du".

Egitarauaz harago

Kongresuan parte hartu nahi duen orok otsailaren 22a baino lehen bere lana UEUra bidali behar du. Batzorde zientifikoak lanak aztertu ondotik, egileek martxoaren 15ean jasoko dute erantzuna. Hautatutako artikuluak, ISBNa izango duen argitalpen digital batean agertuko dira. Programa akademikoari dagokionez, lau saio mota proposatuko dituzte: hitzaldi orokorrak, ahozko komunikazioak, posterrak eta tailerrak. UEUk egitarauari buruzko xehetasunen berri emanen du datozen hilabeteetan.

Miren Josu Omaetxebarria kongresuko arduradunak programa ofizialetik harago ekintzak prestatuko dituztela aipatu du. Hiru egunak Baionan pasatzeko bertan lo egiteko aukera ere proposatuko zaie parte hartzaileei.

ERLAZIONATUTAKO ALBISTEAK